Aizawl: ZPM Leader Lalduhoma chuan ZPM hand holding policy chu sem policy nen a inang lo niin a sawi.
Thawhlehni zana Lungpho Community Hall-a vantlang inkhawmah thu sawiin Lalduhoma hian ZPM hi kuthnathawktute thian, hand holding policy nei an nih thu a sawi a. He policy hmang hian bultanna nei loten bul an tan theihna turin an banah an kai dawn a. Mahni chhungkua theuhin eizawnna atana an duh, an thiam zawngte bul an tan theihna turin bul an tansak dawn niin a sawi.
Lalduhoma hian ZPM hand holding policy erawh sem policy nena a inan loh thu sawiin, “Sem policy chu a inzatin an sem tawp mai a, eng trade nge, eng project nge enfiah pawh a awm lo a, an party a mi lak luh nan leh vote zawn nan an hmang a, development a ni lo a, vote zawnna hmanrua mai a ni,” a ti.
ZPM erawh chuan hetiang ni loin, bultanna nei lo tanpui tlak tanpui nan an thawk dawn nia sawiin, “Kan mamawh zat pawh a inang lo a, kan trade leh project pawh a inang dawn lo a. Project lian deuh a nih chuan loan a ngai dawn a, chung mite tan chuan sorkar hi quarantor-ah kan tang dawn a ni,” a ti.
“Kan thalaite khawvel tukverhah an dak ve thei tawh a, ram hmasawn zawkte tih dan an hriain an hmu a, ti ve thei tur pawhin thiamna an nei a ni. |halaite zingah mi tumruh, taima leh hlawhtling tura chhawmdawl tlak leh tanpui tlak chu kan tanpui dawn a ni. Kan hand holding hi sem policy nen a inang lo a ni,” Lalduhoma’n a ti bawk.
Political party hi an hun a liam tawh chuan khawtlang tan te, bial tan te, ram tante rawngbawl a harsa tawh thin nia sawiin, “Tunah chuan ZPM hunpui a her chhuak ve ta tih hi kan pawm thiam ka beisei a, neutral thinlung pu tam tak kan awm tawh a, party a inziah luh kher ngai ti lem lo; amaherawhchu, ZPM a sorkar loh hlau a theihtawp a beitute neutral rual tam tak an awm ta,” tia sawiin ZPM leader hian party tan bik nei lote chu pen chhuak zel turin a ngen tih a sawi.