Aizawl: December 1 hi khawvel pumah ‘World Aids Day’ hman thin a ni a. Mizoramah pawh district khawpui hrang hrangah he ni puala hun hman niin, Aizawlah chuan khuallian, Health Minister Dr R Lalthangliana hoa hun hman rualin ‘Zoram Harh Rawh’ campaign kharna nen Dawrpui Multipurpose Hall-ah hman a ni.
Thu sawiin Dr R Lalthangliana chuan World AIDS Day leh Zoram Harh Rawh campaign kharna hun Central YMA leh MSACS-ten an inbuatsaih chu lawmawm a tih thu a sawi a. HIV/AIDS hi thalaite mai ni lo, nu leh pa leh naupang thlenga nunna suattu hlauhawm tak natna a ni tiin, “Kan ramah hian eng ang pawhin development hmu mah ila kan hrisel loha nunna kan chân si chuan awmzia a awm lo a ni. AIDS avang hian kan dam chhung hun tur ang dam phak lo hi kan tam ta hle a, he natna hi India ram leh Mizoram pawh kan nun pawt tawitu a ni,” a ti.
Health minister hian, “Eng ang pawhin in leh lo nei tha mah ila, kan dam rei loh chuan engtihna mah a ni lo. Mizoram hi ram ralmuang kan ni a, literacy rate-ah India ramah Kerala dawt ni mah ila AIDS-ah kan sang ta ber a, cancer vei tamna ber kan ni bawk a, tan kan laka kan fimkhur a ngai takzet a ni,” tiin, Zofate nun titawitu AIDS remna tur leh a bona tur atana Central YMA-ten beihpui an thlakpui chuan awmze thui tak a neih a beisei tih a sawi.
Dr R Lalthangliana chuan, tuna ‘Zoram Harh rawh’ thupui hian awmze thui tak nei mawlh se a duh tih a sawi a. AIDS donaah hian tumah tlanchhe lo a, a tihremna tur atana beihpui thlak tak tak chuan India ramah a vei tlemna ber state-ah Mizoram an siam thei tih a sawi a. Inthlahdah erawh a thiang hauh lo a, do rem tur chuan kum hnih khat chhung leka tihrem chi a nih loh thu leh HIV hian nasa takin chhungkaw economy a khawih buai nasat thu a sawi bawk.