Aizawl: Hunpui laia thisen tlakchham a awm loh nan Association for Voluntary Blood Donation (AVBD), MSACS leh Blood Bank tangkawpin December thla chhungin Krismas puala thisen pek an huaihawt chu nimin khan Civil Hospital, Aizawl Medical Superintendent Dr Zoramthanga’n a hawng.
Civil Hospital, Aizawl Blook Bank-a thisen pek hawngtu chuan thisen pek lama Mizo thalaite an thangharh zel chu lawmawm a tih thu leh blood bank-a thawktuten thahnemngai taka an hna theuh an thawk thin chu fakawm a tih thu a sawi.
Mizo thalaite chu thisen pek uar zel tur leh Krismas puala thisen pe theuh turin a sawm a; blood bank-a thawkte pawh an hmazawn theuha an hna leh mawhphurhnate hlen tura bei tang tang zel turin a chah.
AVBD Vice President Dr Zoramdinthara kaihhruai inkhawm tawi neiha AVBD General Secretary Lalrinkima’n a tar lan danin kum tin Krismas vuakvetah thisen petu an tlem avang leh accident a tam thin avangin thisen mamawhna a sang thin tih hriain, AVBD leh Blood Bank tangkawp chuan December thla tir atangin NSS, kohhran thalai pawl, YMA leh NGO dangte sawmin hunpui lai hian thisen tlakchham a awm loh nan thisen pek hi buatsaih thin tih a sawi.
Kumina Krismas puala thisen pek hi December 1, 2022 atangin a ni a, Civil Hospital, Aizawl, Synod Hospital leh ZMC blood bank-ahte thisen pek theih a ni ang.
District danga blood bank-ah pawh AVBD hruaitute leh blood bank officer-ten thisen mamawh dan en chungin Krismas puala thisen pek an huaihawt dawn a ni.