China chuan ni khata Covid kai tam ber ni an tawn mawlh mawlh laiin an inkhuahkhirhna khauh tak hmante chu thlahdul hret an tum hnai niin a lang.
Shanghai leh Guangzhou khawpuiah te chuan hri kai hmuh an pung mek zel a, hetih lai hian Ningani atang khan inkharkhip an thlahdul.
Vice-premier chuan an ramin ‘dinhmun thar dang’ a kai mek thu a sawi.
China-ah hian zero-Covid policy an la kalpui reng chu hmun hrang hrangah mipuiin duh lohna an lantir mek zel.
Inkhuahkhirh duh lohna hi khawthlang lam, Xinjiang-a kar hmasaa in chhawng sang kanga mi 10 an thih atanga intan kha a ni a. Chinese tam tak chuan an inkhuahkhirhna khauh lutuk chuan thihna a thlen niin an ngai a, thuneitute erawh an pha ve thung.
He thil thlen hnuah hian khawpui hrang hrangah inkhuahkhirhna khauh lutuk duh lohna lantir a ni a, police thahnem tak an thawh chhuak phah.
Guangzhou leh khawpui danga inkhuahkhirhna chu Nilaini atang khan thlahdul a ni a. Guangzhou-ah hian a hma lawkin police leh duh lohna lantirtute inkarah tharum thawhna a thleng.
Beijing-ah pawh Covid kai, natna lang chhuak nasa lem lo awmna veng pum kharkhip thin chu titawpin a kai chu a chenna ina awm hran mai phal a ni tawh niin Reuters report chuan a tar lang.
Shanghai leh Chongqing khawpuiah pawh inthlahdul hret a ni.
China-a hripui lenga thuneitu sang ber zinga mi, vice-premier Sun Chunlan chuan hri hi a chak lo hret hret niin a sawi.
“Ramin thil thar hmachhawnin hripui venna kawngah bung thar a kai a. Omicron virus chu a chak lo hret hret a, mi tam tak invenna pek niin hri hi dan chep a ni,” tiin a sawi niin Reuters chuan a tar lang.
China thuneitute hian an ram chuan zero-Covid policy an kalpui chu an la mamawh tih an sawi hnu lawkah hetiang thu hi an sawi chhuak.
China-ah hian tun hnaiah ni khata hri kai an hmuh tam ber ni tawng fovin Nilaini pawh khan mi 36,000-in an kai tih an finfiah.
Ram dang ngaihtuah chuan mi tluklehdingawn 1.4 zet chennaah hian a kai leh thihpui an la tlem hle a, mi 5,200 chuang awrh chauhvin an la thihpui.
Mi maktaduai zelah pathum chauhvin thihpui ang niin US-ah chuan mi 3,000-a pakhat zel thi ang an ni.