An bul tannaah Saudi Arabia lakah mualpho mahse kuminah champion tura rinkai zing ami Argentina in an chetsualna boruak an kalsan a. Round of 16 luh nan football hmuhnawm khelin Poland 2-0 in an hneh.
Nilaini zana Stadium 974 a inkhelah Argentina in kumin a rinkai zinga an tel chhan an lantir a. An chhuanvawr Lionel Messi hovin football mawi leh hlauhawm an khel.
Poland hi tlawm mahse goal difference-ah Mexico aiin an sang zawk a. Saudi Arabia laka goal khat an chhuah chu tuarin Mexico in pathumna an hauh a, Poland hi an tling ta zawk.
La Albiceleste kan hmu
Inkhel tluanin chiang takin Argentina an chungnung zawk a. Ball chang tam zawk leh awmze nei a inpe kual tam zawk an ni.
Poland in ball an um nasa a, a bak erawh tih theih vak an nei lo. Ball an chan tumin an goal nawr a na lo thin.
Argentina in first half-ah sawi hlawh takin penalty an hmu a. Poland keeper Wojciech Szczesny chuan a dansak.
Second half-ah erawh goal khung thovin Brighton a khel midfielder hmasawn Alexis Mac Allister leh Manchester City striker Julian Alvarez ten goal an khung a. Poland in goal nawr aia a ven an ngaih paiwmawh chu tuar mahse an group thlirin a zar an zo pha tho.
Argentina hian round of 16-ah Australia an hmachhawn leh anga. France leh Poland an inkhel ve thung ang.
Argentina coach Lionel Scaloni chuan last 16 an la lap dawn lo tih a sawi a. “Inkhel awlsam a awm tawh lo. Australia hi an awlsam dawn anga ngai chuan an hre sual a ni. Vawiina kan chak avangin a dawtlehah kan chak dawn tihna a ni lo.” a ti a.
“Ni hnih dana inkhelh hi thil awm ang lo leh atthlak tak niin ka hria. Group hmahruaitu kan ni chunga hahdamna hun kan nei lo hi a mak ka ti angreng.” tiin fixture inhnawhtawt chu a sawisel.
Tunisia an tling zo lo
France in an tlin chian tawh avangin nasa takin an team an siksawi a. Tunisia nen inkhelin 1-0 in tlawm mahse African ram an tling pha lo.
Education City Stadium-ah Tunisia captain Wahbi Khazi chuan second half-ah goal mawi a khung chu France in an sut thei lo.
Substitute Antoine Griezmann goal khung pawm a ni lo bawk a. Mahse heti chung hian inkhel lehlam result avangin Tunisia hi point hnihin an tling lo.