Mizoram sorkar thupek angin nimin atang khan Aizawl khawpui leh district khawpuiahte eirawngbawlna gas mamawhte an in ngeiah pek tawh tura tih a nih angin LPG distributor-ten sorkar thupek tihlawhtling turin hma an la mek.
Food, Civil Supplies & Consumer Affairs secretary chuan kumin November 1 khan December 1 atangin AMC huam chhung leh district khawpuiahte gas home delivery kalpui a nih tur thu hi hriattirna a tichhuak a, sorkar thupek bawhzuiin LPG distributor-ten home delivery kalpui turin hma an la mek a ni.
The Zozam Times zawhna chhangin Mizoram Indane Distributor Association hruaitute chuan distributor-ten an huam chhung theuha home delviery kalpui turin hma an la a, an huam chhung veng zawng zawngah vawi leh khatah tih vek theih lohte pawh a awm thei a, a tahtawla kalpui zel tum a nih thu an sawi a, consumer-te chu online-a gas chah dan turte hrilhin, an phone number-te nen an inthlunzawm mek tih an sawi.
Gas home delivery hi kum 2019 khan pilot project hmangin Aizawl chhunga veng paliah kalpui a ni a, Covid-19 leng avanga hmalakna a khaihlak hnuah kuminah chak zawka hma la lehin, kumin kum chanve vel atang khan Aizawla LPG distributor 11-ten an huam chhunga veng pathum theuhah home delivery hi an kalpui leh a, tunah hian AMC huam chhung leh district capital-ah pawh kalpui vek tura tih a ni leh ta a ni.
Hemi chungchanga zawhna chhangin supply department hotute chuan hriattirna an tihchhuah angin distributor-ten an huam chhung theuhah home delivery chu an kalpui tura an beisei thu an sawi a, sorkar thupek chu distributor-ten an tihhlawhtlin leh hlawhtlin lohte an enzui zel dawn tih an sawi a ni.