Prime Minister Narendra Modi-a chawr chhuahna state, Gujarat-ah chuan Ningani khan assembly inthlan huaihawt a ni a, tun tumah hian Hindu nationalist party chu a zawna term sarih nan chak leh ngei tura ngaih a ni a, hetih rual hian kum 2024-ah ram inthlanpui a awm dawn avangin he inthlan hian ngaihven a hlawh phah.
BJP hi khawthlang lama industrial state-ah hian kum 1995 hnu lamah an la sorkar chak char a, Modi-a pawh kum 13 dawn chief minister niin kum 2014-a prime minister a nih hma zawk kha a ni.
Ngaihdan lakna hrang hrangah chuan Gujarat inthlanah hian thil man sang leh hna nei lo tam lutuk avanga beihna nasa tak tawk ni mah se hneh takin BJP hi an tling tho tur anga ngaih a ni.
Kum 10 awrh liam taa din chauh, Delhi leh Punjab-a thuneihna chang mektu, Aam Aadmi Party (AAP) chu eptu party lian ber tura ngaih niin Congress party chu an dinhmun tlahniam tura ngaih a ni.
Ningania vote thlak hi a thawh khatna niin Thawhtanniah thawh hnihna neih leh tur a ni a, December 8-ah vote tlate chu chhiar a ni ang.
Kum 45 mi, Surat khawpuia vote thlak, Dheeraj Patel chuan ei rukna leh hna nei lo tam chu inthlan zawhah hian sorkar ding tu pawhin an ngaih pawimawh ngei a beisei thu a sawi.
“BJP hi he state-ah hian an inbun nghet hle a. Hma pawh an tisawn a; mahse, ei rukna tam zel hi hmasawnna an thlen ruala an ngaihven a ngai a ni,” tiuin Patel chuan Al Jazeera hnenah a sawi a. “Tumahin ei rukna leh hna nei lo tam hi an sawi ri ngai lo,” a ti bawk.
Surat-a cheng ve tho, la leh puantaha sumdawng, Vishnu Kumar chuan AAP-in inthlan an chuh ve chuan inthlan chu kil thum atanga chuhna a siam tih a sawi.
“Gujarat politics-ah AAP lo inlanin BJP tana eptu chak tak an rawn ni mek a; mahse, inthlan hmaa anmahni bawrtute hi vote-tute an ni zui kher ang em tih a chiang lo,” a ti.
State inthlan hnuhnung ber, kum nga kal taah khan BJP hian bial 182 awmah bial 99-ah hnehna an chang a, Congress-in bial 77 an la ve bawk.
ABP-CVoter-in November thlaa ngaihdan an lak atang chuan BJP hian tun tumah hian bial 131 atanga 139 la tur anga hmuh a ni a. Congress chuan bial 31 atanga 39 leh AAP-in bial 15 thleng la ve thei turin an ngai.
India TV-Matrize-in November thla thova opinion poll a lakah ve thung chuan BJP hian a tam berah bial 119 la tur angin an hmu.
AAP hian Delhi leh Punjab-a an lo tih tawh ang bawkin BJP pawh thlak nan electric leh bill dangte a thlawna tih an tiam.
Congress ve thung hian September atang khan ‘inpumkhatna kawng zawh’ huaihawtin ram pum kea zawh chhuah tumin Rahul Gandhi-a hovin an bei mek a. Hemi hrulah hian inthlanah hian BJP sorkar chu ‘inhuatna leh inthenna thlentu-ah’ puhin an bei a, kawng zawh hmang han an lo ropui tawhna thin hnuh kir leha inthehlar thar leh an tum mek.
Tun tum inthlan hi Morbi khuaa suspension bridge chima mi 135 zet an thih hnu thla khat leka neih a ni a. He chhiatna thleng hian mi a tithinrim nasa hle a; mahse, chu chuan BJP hnehna kawng a dal zo dawn chuang lova ngaih a ni.
Right-wing party hi hmar lama Himachal Pradesh state assembly inthlanah pawh hnehna chang ngei tura ngaih an ni a.Anni hi thla hmasa tawpa inthlang kha niin December 8-ah tho vote tlate chhiar ve a ni ang.