Haiti-ah gang-ten mi 12 that, in hal bawk

Gang member-ten Haiti khawpui bul khuaah mi 12 vel thatin chenna eng emaw zat an hal bawk tih mayor-in a sawi.

Joseph Jeanson Guillaume chuan police leh mi chengten mi sual rualte hi an khawpui, Port-au-Prince hmar lama Cabaret khua atang hian ni tam vak lo liam taah khan an um chhuak a, tunah an lo kir leh ta tih Nilaini khan a sawi.

“Tukin khan mihring ruang kang eng emaw zat kan hmu a ni,” tiin Guillaume chuan a sawi.

Haiti ram china a tam zawk hi gang thiltithei tak takten an thunun a, Cabaret khua pawh hi lak tumin thla eng emaw zat an bei tawh.

Khua hi an rama kawngpui lun ber kama awm a nih avangin lirthei kal vel leh sumdawnna pawh a buai phah hle niin mayor chuan a sawi.

July, 2021 khan President Jovenel Moise-a thah niin hemi hma leh hnu lamah an ram politics a buai zual a, eibar dinhmunah an hniam zual em em bawk.

Gang-te hi an inla lian tual tual a, ram pawh an zauh chakin thil an tithei tawlh tawlh a, mi sang talin an ram an tlanchhiatsan phah mek.

United Nations-in a chhinchhiah dan chuan September-ah khan Haiti-ah hian police officer 13,000 vel an awm a, an indaih lo tak zet a, police pakhat zel mi 1,000-in intawm ang an ni.

“An khawpuiah ringawt pawh gang-te avang hian mi 96,000 dawn hmun dangah an tlanchhe tawh,” tiin Al Jazeera chuan a tar lang.

An in leh lo chhuahsante hi khawpui huam chhung thova Cite Soleil vengah thenkhat an cheng a, hetah hian tui, ei tur leh riahna pawh a awm mumal lo thung a. UN chuan Cite Soleil-a cheng mi 19,000 chuang chu an tam niin a tar lang.

Leave a Reply

error: Content is protected !!