India khawthlang lam, Mumbai khawpuia police-te chuan mipa pahnih, South Korean hmeichhiain live-a video a tichhuak lai an tihbuai avangin an man.
He thil hi Thawhlehni zana thleng kha niin Hyojeong Park-i hi khawpui fang kuala video lain live-in a tichhuak nghal a. Social media-a Mhyochi tia hriat hi mipate hian an tibuai ta a ni.
Video-a a lan dan chuan kum 24 mi, Park-i hi a banah kaiin a biangah an fawp bawk.
Heng mipa pahnihte hi mipat hmeichhiatna lam hawia mi tibuaia puh an ni tih news agency ANI chuan a tar lang.
Park-i hi livestreaming service Twitch-ah zuitu mi 12,000 chuang nei niin a video dah tam ber hi video game a khel lai leh mi thil siam a ei lai a ni.
Chawlhkar tam vak lo liam ta atang khan India hi tlawh mekin live vlog hmangin a thil tawn hrang hrangte chu a tilang thin.
Thawhlehni zanah hian Mumbai-a Khar veng fang kualin hetih pah hian amah zuitu (follower) leh kawng sira mi lo dingte nen an inbia a, hetih lai hian mipa pakhatin a lo pawt buai a ni.
Twitch-a video-a a lan dan chuan mipa pakhatin a bânah manin a motorbike-a chuang turin a pawt a. A biangah a fawp bawk.
Park-i hian a hlauh hmel hle a, a kalsawn nghal a, ‘haw a hun tawh’ tiin a sawi zui a; mahse, a hmaa pawttu leh a thian pakhat chuan bike-a zuiin a phone number an dil zui leh a ni.
A tawpah mipa dang pakhat, kawng lo kântu chuan puiin a tibuaitute pawh kalsawn turin a ti ta a ni.
Video-ah hian Park-i hi rang takin a thlenna khualbukah a tlan lut nghal tih a lang a, a tawpah a him ta tih a sawi lai a lang leh bawk.
A thil tawn hi Instagram story-ah a dah zui a, a thu dah telah a theihtawpin ‘khatiang inpawh buaina thleng lo tura chet a lak’ thu a dah tel.
Park-i hian Twitch-a a video comment-tu zingah khatiang a tawh chungchangah amah demna pawh a awm thu a sawi a, ‘mi kawmnel turin a awm hma lutuk’ chu an demna a nih thu a sawi a. Amah pawt buaipui nen pawh khan an inbe hmasa tih a sawi.
Thenkhat erawh chuan an tan a, police hnena thlen thuai turin an ti.
Nilaini khan Twitter-ah mi pakhatin a video clip dah chhuakin mipate chet dan chu rapthlak a tih thu a dah tel a. Mumbai police pawh tag telin hrem lohva chhuah lo turin a ti bawk.
Police hian Twitter-a dahtu leh Park-i hi bepawp nghalin thil thlen dan kimchang an zawt fiah nghal a. A hnuah mipa pahnihte chu an man tih an tar lang zui ta a ni.