Australia in an tana inkhel pawimawhah Denmark an barakhaih a. Hnehna changin kum 16 chhunga a vawikhatna atan World Cup-ah knockout stage an lut.
Nilaini zana Group D inkhelah Denmark in tling turin chak ngei an mamawh a. Al Janoub Stadium a inkhelah ball chang hnemin inkhel thununtu zawkah an tang.
Mahse Socceroos in an hun remchang neih an hmang tangkai hle. An penalty area-ah Australia in Denmark ball hloh chu changin rang takin Denmark goal lamah an luhpui a. Counter-attack rang leh hlauhawm atang Mathew Leckie chuan minute 60-naah inkhel a goal awmchhun a khung a. 1-0 in Australia an chak.
Group D-ah point ruk hmu in Australia in pahnihna an hauh a. Hetihlai hi World Cup-ah a zawna match ruk an tlawmna a ni thung. World Cup-ah a zawna an tlawm rei ber tum an hmang mek.
Tun World Cup-ah hian mi tam takin Denmark hi team langsar ni si lo zinga ngaihthah miah loh tur zinga an chhiar tel a ni a, an lakah beiseina an nei sang.
Euro 2020 semi-final thleng thei an ni a, UEFA Nations League-ah mahni mual leh away inkhela France hneh thei an nih avangin team chhia an ni lo tih a chiang.
Amaherawhchu Qatar-ah beisei an pha lo. Group D atang vawi khat chauh goal an khung thei.
Goal khung an harsat chu manager Kasper Hjulmand pawhin a buaipui a ni a. France nen an inkhelh tuma bul a tan tir attacker pathum chu thlak danglam in Mikkel Damsgaard, Victor Nelsson leh striker Andreas Cornelius te aiah Martin Braithwaite, Brentford midfielder Mathias Jensen leh Andreas Skov Olsen te bul a tan tir a. Awmzia erawh a nei thui lo.
Australia head coach Graham Arnold chuan, “Inrintawkna nen, beiseina nei sang tak chungin rim takin kan thawk. Rilru puthmang dik pu chunga player-te an inpek thin avangin tun hi kan thleng. Ka player-te hi ka chhuang tak zet.” tiin inkhel zawhah a sawi.