Aizawl : Provisional Employees’ Association of Mizoram, PHED Branch-in nimin khan General Assembly vawi 1-na Multipurpose Cultural Complex, Berawtlang-ah an hmang a. Deputy Chief Minister Tawnluia’n a hmanpui.
Tawnluia chuan “sorkar hnathawk a lian ber atanga a te ber thlengin kanin kamki vek a, pawimawhlo tumah kan awm lo tih hria ila” a ti a. “Hmanlai deuh atanga a kalphung mumal lutuk lova sorkar hnathawk Muster Roll kan tih thin kha tun sorkar hmalaknain Provisional Employee tia vuahin kal dan thar leh mumal zawk duan a ni ta a ni” a ti.
Dy CM chuan “kan hun tha zawng zawng sorkar tana hmang ten sorkarah regularisation an nih theih nan dan thar hrang hrang, post vacancy a awma an ngheh theih nan dan thar hrang hrang- kum 7 hnu a, vacant post a awm a seniority behchhana regular theihna dan te, regular te hlawhzat atanga 50% fix pek te, Casual leave chungchangte, regular post sorkarin a lak apianga provisional employees tan 35% reservation te, kum khatah hlawh 4% increment te leh thildangte duanchhuah thar a ni” a ti bawk.
Tawnluia chuan sorkarin a hnathawkte a ngaihsak angin thawktute chu an kuta hna tla zawng zawng chu hunbi nei leh thahnemngai taka thawk zel turin a chah a. Tui enkawltu bik an nihnaah an mawh a sang hle tih sawiin, rinawmna leh inpekna nena mipuite rawngbawl zel turin a sawm bawk a ni.