State Council of Educational Research and Training (SCERT)-in nimin khan Poetry festival-a inelnaa tithate leh ‘Proficiency Award in English’ dawngtute bakah National talent search (NTS) exam-a tlingte hnenah Human Resource Development Board Vice Chairman Dr. L. Thangmawia hovin lawmman an sem.
Poetry festival hi Higher secondary school zirlaite tan kum 2011 atang khan buatsaih thin a ni a. On-the-spot poetry writing competition kumin November ni 30 a neihah khan school 9 atangin zirlai 46 an tel a, Saptawngin poem an inziahsiak a, C. Laltlanhlua, Class XII (Arts) Govt. Mizo HSS, Aizawl ziak ‘The Uncertain Future’ chu poem tha bera thlan a ni a, Lalrinhlui, Class XI (Science) Govt. Mizo HSS, Aizawl ziak ‘There’ chu pahnihna niin, Miriam Lalruatpuii, Class XI (Arts) Govt. Chaltlang HSS, Aizawl ziak ‘A Gaze on to the future’ chu pathumna a ni.
Poetry festival-ah hian HSLC leh HSSLC exam-a English subject-a top 3 te hnenah Proficiency Award in English sem thin a ni a. Kumin-ah HSLC-ah leh HSSLC ah zirlai 24 ve ve in he Proficiency Award hi an dawng.
National talent search exam, India rama kumtin buatsaih thinah Mizoramin seat 50 neiin, kum 2021 ah naupang 50 an exam-a 4-in scholarship an dawng a. He scholarship dawngtu zirlaite chuan lehkha an zir chhungin thlatin sum dawngin, pawl 11 an zir chhungin thlatin Rs. 1250 an dawng thin a, an pawl san chhoh dan ang zelin an scholarship hi a pung ve zel a ni. Kum 2021 NTS exam-a scholarship dawngtu zirlai te hi Lalpekhlui Renthlei, St. Paul’s HSS, Aizawl; K. Lalhriatzuali leh Lalhriatpuii Pachuau, Baptist HSS, Lunglei ve ve leh Lalliansanga, ARR-ELLS School, Aizawl te an ni.
Hun hmanpuitu HRD Board Vice Chairman Dr. L. Thangmawia chuan English pawimawhna a sawi rualin, Mizo tawng hnualsuat lo turin zirlaite a fuih a. “Kan hnam tawng leh international tawng English kan tankawp tir thiam a ngai” a ti.
L Thangmawia chuan zirna atana ICT hm- an tangkai pawimawh zia sawiin, “mitinin kan hum kan mobile phone te hi subject hrang hrang zirna atan leh zirtirna atan tun aia tangkai leh zualin hmang ang u” a ti bawk.