- Ruata
Toyota MPV lirthei lar leh hlun Innova chu a thar Innova Hycross phochhuah a ni ta a, a hma khan Indonesia ah Zenix tih hming puin phochhuah a ni a, India version tihchhuah a ni vat ang tiin kan lo sawi tawh a, tunah hian a rawn thleng dik ta a ni.
Toyota Innova Hycross hi lirthei model thar hlak tluk deuhthaw a ni a, Innova nen chuan eng emaw chenah la inang mahse platform thar hlak bakag strong hybrid powerplant duhthlan tur a awm tawh bawk a ni.
A pawn lam
Innova Hycross hi Indonesia-a an tlangzarh tak Zenix nen a inang deuh chiah a. He Innova chhuan thar model hi SUV design ang an put tir ta a, a mawi viau mai a. A hma grille te pawh a tung lehzual a, a bonnet a sang hret bawk a. A grille hi hexagonal grille design niin gunmetal finish a ni a. Innova Hycross hian automatic LED headlamp a nei a, a hmalamah bumper hlai phak mai a nei bawk a, hei hi silver accent-a chei a ni bawk a ni.
Tuna chhuak mek Innova Crysta ang deuhin tukverh hlai tha tak tak a nei a, hei hian a chhung pawh a tieng nuam viau a. A thutna tlar tin tan pawh hawivelna a nuam em em a ni. A hma aia lian zawk 10-spoke alloy neiin chrome finish a nei a, hei hian a ti lang dak nalh lehzual em em a ni. Hycross dung leh vang len zawng hi a indawt danin 4,755mm leh 1,850mm a ni a, tuna chhuak mek Innova Crysta aiin a tam hret ve ve a ni. A wheelbase lamah pawh Innova Hycross 100mm in a thui zawk bawk a ni.
A chhunglam
A chhunglam chu Innova Crysta chhuak mek nena a danglam hlak thung a, a mawiin a changkang lehzual em em tawh a ni. Multi layered dashboard mawi tak a nei a, steering wheel leh semi digital instrument cluster, 4.2 inch MID display awm tel a neih chu hmun danga Voxy MPV hralhchhuah mek ta a tawm bawk a ni. 10.1 inch floating touchscreen infotainment system hlai leh changkang tak a nei bawk.
A dashboard hi leather nem tha taka tuam a ni a, metallic decoration kan hmu tel bawk a. Thil thar kan hmuh pakhat chu dashboard-mounted gear lever console hi a ni a, a dashboard siin sang deuh vahah a gear a sawi theih dawn a ni. Innova Hycross chhung hi rawng chi hnih, rawng uk leh rawng dum inpawlh a ni a, Dark Chestnut leather seat a nei bawk a ni.
Toyota Innova Hycross chi hrang leh kentel
Hycross hi variants 5 a awm a, man to ho hian paddle shifter, connected car tech, ventilated front seats, nine-speaker JBL audio system, ambient lighting, multi-zone climate control (front and rear) leh powered tailgate te a nei a. Innova lirtheia a vawikhat nan Hycross hian panoramic sunroof lian tha tak a nei bawk a ni.
Innova Hycross tharah hian Toyota Safety Sense suite ADAS technology a awm a. Hemi hnuaiah hian lane keep assist, blind spot monitor, adaptive cruise control, rear cross-traffic alert leh pre-collision system te a awm a, chetsualna laka lirthei himna tur leh a lirthei khalhtu tihahdamna tur a ni ber a ni. Himna hmanraw dang a nei te chu airbag paruk, ABS with EBD, Traction Control leh ESP te a ni.
Seating configuration lamah chuan Innova Hycross hi mi 7 leh mi 8 chuan theihna a awm a. 7-seat configuration hian a tlar laiah captain chair a nei a, hetah hian a tlukpui MPV hoa a vawikhatnan ottoman function a awm tel a ni.
Monocoque construction
A hma khan Innova hian ladder frame chassis pangngai a hmang thin a, tunah chua monocoque chassis zangkhai zawk a hmang tawh dawn a ni. Hei hi Toyota TNGA-C platform nghahchhana duan a ni. Body on frame an tih, ladder frame chunga a body innghat, SUV leh lirthei lian tam taka kan hmuh ang kha tuna chhuam mekah hi chuan a lirthei duan dan a ni a, a tharah chuan a lirthei tizang tur leh MPV tam tak te siamphung rawn tawm turin tihtawp a ni ta a ni.
A khawl
Innova Hycross hian petrol leh strong-hybrid khawl neiin diesel hmang a awm lo a. Strong-hybrid powertrain hi 2.0-litre, four-cylinder niin Toyota fifth-generation strong hybrid tech (M20A-FXS) nghahchhana duan a ni a, 152hp power leh 187Nm torque a pechhuak thei a ni. Electric khawl nen thlunzawm a ni bawk a, a pahnih tangrual hian 184hp power a pechhuak thei a. He khawl hian e-CVT transmission a nei tel bawk
Non-hybrid version hi 1,987cc khawl niin 172hp power leh 205Nm torque pechhuak thei a ni a, CVT gearbox a nei bawk a ni. Innova Hycross thar hi a hma ke phih kal, front wheel drive ani tawh dawn a. A hmaa a hnunglama differential awm thin ang kha a ni tawh dawn lo a ni.
A tui heh zawng lamah chuan hybrid khawl zawk hian petrol litre khatin km 21.1 a thleng thei a, a fuel tank full-a a tlan hlat theih zawng hi km 1,097 a ni.
A man leh tlangzarh hun tur
Toyota Innova Hycross hi Rs. Nuai 22-28 inkar man vel tura beisei a ni a. Nakum January thlaa tlangzarh tura beisei a ni. Toyota Innova Hycross hian tuna chhuak mek Innova Crysta a rawn thlak dawn lemlo a, Innova Crysta hi chu a chhuak reng dawn tho a, Toyota Innova lirthei duhthlan tur a rawn awm belh chauh dawn tihna a ni a. MPV hlun leh hman hlawh em em changkang leh mawi bawk si a rawn chhuak tur hi a hmang nasa tu India mipuite tan thu lawmawm tak a ni awm e.