Aizawl FC in HeroI-League 2022-23 a an match nga na vawiin tlaiah an khel dawn a. Goa a Tilak Maidan-ah Churchill Brothers FC nen an inkhel dawn.
Mizo club hian tun season-ah khelh li atangin point li an hmu tawh a. An inkhel hmasa pathum hi mahni mualah niin point 9 hmu thei an nihlaiin point li chauh an hmu.
Hei vang hian tun season a chak la nei miah lo, point khat chiah hmu Churchill Brothers lakah hian hnehna pawimawh tak chang thei tura beisei an ni.
Goa club nen hian I-League-ah vawi 10 inhmachhawn tawhin vawi li ve ve an chak tawh. An inkhel hnuhnung berah erawh Goa club in 2-1 in hnehna an chang.
Aizawl FC assistant coach Victor Lalbiakmawia chuan, “Kan team in hma kan sawn zel a, kan match nga na a ni a, kan inkhel bakah player naupang zawkte pawhin hmasawnna an ngah tawh.”
“Kan tlawm thinna te pawh kan khelchhe ngai lova, engemaw tihsual hlek vang a ni. Churchill hi an tang dawn a, a hautak ang, mahse kan beisei a sang.” tiin inkhel tur a thlirlawk.
Churchill Brothers head coach Antonio Rueda chuan, “Kan tan chuan final anga ngaih tur a ni tawh. Season tira kan inbeisei angin tunah kan awm lo, kan dinhmun hi ngaihngam taka enliam mai chi a ni tawh lo.” tiin chak an mamawh thu a sawi.
Churchill midfielder Lalawmpuia Sailo chuan, “Ka season hmasa berah beisei angin bul kan tan lova, mahse rim taka thawkin kan bei zel ang.” tiin a sawi ve bawk.