Mizoram Football Association leh Aizawl khawpui chhunga college hrang hrang Student’s Union hruaitute chu Zirtawpni khan MFA Office-ah an inkawm a, All India Football Federation President lo zin tur leh Mizoram Premier League Final-a thawhho dan tur an rel.
AIFF President ni chunga Mizorama rawn zin hmasa ber tur Kalyan Chaubey chuan December 6, 2022 hian MPL Final a rawn en dâwn a, MFA chuan ropui taka lo läwm a tum a, college zirlaite nen thawk dunin he hunah hian college zirlaite chu an Student’s ID Card hmangin inkhel an en thei ang.
College zirlai hruaitute hian kum lo kal zel turah MFA nena thawkhoa football leh futsal inelna buatsaih tha an tih thute an sawi a; refereeing, coaching leh football management lama career guidance lam gawk programme siam dante sawi a ni a, la sawiho zel tura dah a ni.