China ram laili, Henan province-a thla hmasaa tui lian vanga thi chu mi 302 an tling tih thuneituten an puang.
Ruah nasa taka a sur hnua tui lian rapthlak tak thlengin a nuaina hmunah hian mi 50 chuang chin hriat lohvin an la awm bawk.
Tui lian hi mi maktaduai 13 velin an puang a, chenna in 9,000 dawn a chhe bawk.
Thi tam ber hi Zhengzhou khawpuia mite niin an lei hnuai relkawng (subway system)-ah tui a luang lut vak a, khawlaia lirtheite pawh tuiin a la nasa hle.
He khawpuiah hian kum khat chhunga ruah tui an dawn zat ang vel chu ni thum lek chhungin a sur nia sawi a ni.
Thawhtanni khan Zhengzhou Mayor Hou Hong chuan thuthar lakhawmtute kawmin thi zar hi a puang a, lei hnuaia lirthei hunna hmunah ruang 39 hai chhuah belh a nih thu a sawi bawk.
Subway system-a Line 5-ah tui nasa taka luang lut avangin mi 14 an thi tih a sawi bawk a. Thla hmasaa he thil thlen lai hian social media-a video thehdarhah chuan rela tang laklawhte chuan tuiin a chimna karah an lu chu tui pawn lamah an dah hram hram lai a lang.
Subway-a thite sunna atan hian a bul subway station-ah thlahna pangpar dahna siam a ni a, hei hi kar hmasa khan khar a ni.
Tui khuah tam tak chu hlauhawm chin chhinchhiahna chung lam thleng a tlin avangin sipaite chu tui la kawi tura rawih an ni.