Aizawl: MPCC Vice President Lal Thanzara chuan Congress party-in an thu tiamte an tihhlawhtlin zel laiin MNF sorkar erawh chuan an intiamnate an tihlawhtling ve ngai miah lo thung tih a sawi.
Nimina Congress Bhavan-a inkhawmah thu sawiin Lal Thanzara chuan MNF leh Congress sorkar khaikhinin, Congress party-in ‘an ti ang’ a tih chu an tihhlawhtlin zel laiin, MNF erawhin ‘an ti ang’ an tih chu an tihlawhtling ve miah lo thung tih a sawi.
“‘Kawng chhawng kan siam ang,’ an ti a, a bul pawh an la tan lo a, ‘Aizawl khawpui hi traffic jam awm lohna khawpuiah kan siam ang,’ an ti a, PAHOSS an sem chiam a; mahse, vawiin thlengin traffic jam a la reh phah lo. Assam Rifle chhuah hun tur an sawi pawh engmah a dik thei lo. Kuhva ro supply an titawp thei miah lote hi an hotu lawkten chanvo an neih ve tlat vang a nih ka ring tlat. Sethawnah ruihhlo ngaite enkawlna lian ber siam tura an insawi pawh ruihhlo dona lamah hmalakna an nei mumal leh si lo a, Mizoram chu drugs hmunpuiah a chang chho mek a, drugs-in kan thalaite a suat mek a nih hi,” a ti.
Lal Thanzara hian Congress party-in sorkar turin hun tha tak a nei tih sawiin, “Kan President Pu Lalsawta, mi hmingtha em em hi mipuiin a ACR an en a, an ring a, an duh tlat. Pu Zoramthanga ACR erawh chu an duh lo a ni mai lo, an nuih a za tlat zel. Pu Lalduhoma ACR pawh a hnawk a tam lutuk a, a sena inziak a tam bawk si a, mipuiin an ring zo tak tak lo,” a ti bawk.
Tunah hian Congress party aia sorkar siamna hun nei tha party dang an awm lo nia sawiin Lal Thanzara hian, “Inlungrualna nena kan kal zel a, ‘chakna ni loin, thiltihtheihna ni loin, ka thlarau zawkin le’ kan tih ngam chuan kan sorkar leh em em ang,” a ti a. Candidate hming tar chhuaha an tel avanga party hmel a bal dawn a nih ai chuan ding lo ngam mai a that zawk thu a sawi.