Mizoram Chemist & Druggists Association (MCDA) chuan a nazawnga damdawi fak mawi emaw, a tlawm nazawng emaw lei lo turin mipui an chah a, damdawi reng reng damdawi zuarte dawr atanga lei ngei a him ber tih a sawi.
MCDA hruaitute chuan nimin khan Aizawl Press Club-ah thuthar thehdarhtute an kawm a, an president, R Thanglura chuan damdawite chu zawrh phalna, drugs license nei loin an duh duha an lo zawrh ve theih a ni lo a, hetihlai hian hmun thenkhatah leh office velah mi thenkhatin bag leh polythene-a khaikualin an zuar fo thin tih hriat a nih thu a sawi a, hengte lo leia ei hian thil pawi pawh thleng mah se chhui chhuah a harsa tawh thin tih a sawi a; damdawi reng reng chu damdawi zuarte dawr atanga lei ngei a him ber thu a sawi.
R Thanglura chuan damdawi zuar thenkhatin an drug license neihte hmang sualin thil dik lo leh mihring tana hlauhawm leh nunna hial chân theihna tur a ni tih hre reng chungin sum leh pai hlawkna turin ruihhlo zawrh nan an hmang thin tih a sawi a, “Hetianga license hman sual hi a pawi kan ti a, kan dem takzet,” a ti.
Dan phal lohin, mi drug license hawh hmanga damdawi zuar an awm thin a, hei hian damdawi tha lo leh a nihna tur ang quality ni pha lo damdawi chah luh leh zawrh pawisak lohna a tihluar hle tih sawiin, dan pela chete chu chhuichhuahsaka a tul anga an chung dan anga hma la turin sorkar an ngen tih a sawi.
Damdawi chu mihring damna leh thihna hial thlen thei a nih avangin online marketing-a chah chu thil pawi tak a awm theih avangin online pharmacy-ah kher chuan sorkar laipui pawh a khauh tiin, online hmanga damdawi chah chu a him tawk loa an hriat thu a sawi bawk a ni.