Aizawl: Health Minister Dr R Lalthangliana’n Govt Sialsuk High School kum 70 tlin champha, platinum jubilee lawmna leh haw rûnpui nimin khan khuallian niin a hmanpui.
Thusawiin Dr R Lalthangliana chuan Sialsuk hi Mizorama mi hmingthang tam tak chhuahna hmun a nih thu a sawi a. Sialsuk hi health history-ah record tha tak awmna a nih thu sawi bawkin, “Kan pian leh murna hi khaw lian tak a nih loh pawhin tumruhna leh taimakna kan neih tlat chuan mi ropui tak a nih theih tih i hria ang u,” a ti.
Khuallian, health minister hian tunlai khawvelah certificate tha tak neih ringawtin hna tha a hmuh theih tawh loh a, thiamna tak tak neih a ngai tawh tih a sawi a. Zirtirtu leh zirlaite chu chona pein, “ZMC atana pawimawh tur thiamna sang tak bik nei professor kan mamawh pawh a zawnin kan zawng a, a ram mi kan inhmu zo lo a, hnam dang pitar leh putar pension tawh Rs 2,50,000 ten kan ruai a, a rilru nat thlak ka ti thin. central service leh all India service-ah kan tlahniam zel bawk a, vawiina lokal zawng zawngte hian kan rilru ngaihtuahna siam tharin theih loh a awm lo tih hriain ngaihtuahna thar nei vek ang u,” a ti.
He hunah hian khualzahawm, bialtu MLA Prof. F. Lalnunmawia pawhin jubilee souvenir tlangzarhin thu a sawi bawk.
Health minister hian Aibawk PHC tlawh nghal bawkin, damdawi in mamawh an neih hrang hrangte a enfiah a. Hei bakah, ZMC-a Academic Block building-a department hrang hrangte chu a tlawh nghal bawk a ni.