Kawng chhawng siam tura tha thawh tan a hun
MNF in sorkar na an siamtirha kan hriat hmasak leh hriat ngun pawl chu kawng chhawng siam a ni a, inthlan dawna an auhla a ni bawk. A bikin kan chief minister hian an sawi ngun a, sorkar na an chan hnu pawhin hriatreng leh sawizui a hlawh phah ta reng a ni.
Sorkar na siamin an kal zel a, term chanve ah pawh a ban phun hmuh tur a la awm lo a, assembly house-ah CM a insawifiah chho leh a, a hlawhtlin hun tur kan la hre thei rih ta lo chu a ni phawt mai. Hetih lai hian siam ngei tuma hmalak erawh niin a hriat a, kan thenawm state thenkhatah erawh chuan an sawi an sawi thawm hriat tur a awm lo chungin an siam mai a, kan lo hre ve chhunzawm mai; sorkar insawihfiah hun kan nghak bik tawp emawni bik thin ni?
Assembly house a zawhna leh chhanna hunah chief minister Zoramthanga chuan, “Vaivakawn football field tawp atang khuan ban phun chho ila, in sa chho ta ila, tah chuan Vaivakawn pengthuam kawng ân-a in neite chu awm ta se tiin project kan kalpui a, smart city atangin tih dante kan zawng,” tiin, in neitute nen pawh an inbe tawh tih a lo sawi tawh a, an hmalakna a kal chak hlei thei lo pawh a ni ang, mah se tunah a thawm a rawn ri leh veleh ta hrim hrim hi a lawmawm hle.
Aizawl khawpui kawngpui chep leh motor len tawh lohzia kan hria a, kawng thar sial ngai tak a ni tawh. Hemi kawngah hian CM hian ngaihtuahna a seng nasa hle tih a hriat a, hma pawh a la nasa viauin a lang. Mahse, hmasawnna leh hnathawh em em sawi tur hriat si loh hian a thawm chauh kan hria ang tih a hlauhawm a, tuna kawng chhawng kan buaipui mekah pawh hian a tak ram thleng ngei turin sorkar hian thapui thawh thei se la, chak leh zualin ke pen se, sawi chhen lova a taka hnathawh lang ngei turin hma pawh la chak thei se a tha hle.