Kumin World Cup a zan ngaihnawm ber tia chhal ngam a thleng a. Group E-ah tlin tum ram palite inkhel result in ngaihven a hlawh.
Japan in Spain lakah hnehna an chan avangin Germany in Costa Rica laka hnehna chang ve tho mahse an tling zo lova. Spain leh Japan an tlang.
Al Rayyan lamah
Japan in world champion hlui Germany an hneh hnuah world champion ni tawh dang an hneh nawn. Spain lakah goal sawihlawh tak hmangin 2-1 in an chak.
Japan chakna goal hi minute 51-naah a lut a. Ao Tanaka goal khung tur chu a siamsaktu substitute Kaoru Mitoma chuan a ball a pek hma in a out hman niin a lang. Video Assistant Referee hman niin a out lova pawm a ni.
La Roja in first half-ah Alvaro Morata tauh goal hmangin goal an khung a. Cesar Azpilicueta cross chu khungin hma an hruai hnuah inkhel an thunun tha viau a, dinhmun thaah an ding.
Mahse Japan in inkhel kaldan an thlak danglam thuai a. Halftime zawha an dahluh Ritsu Doan leh Mitoma ten awmzia an nei nghal.
Minute 48-naah Doan-a’n an si phurh sutna goal tha tak mai a khung a. An chakna goal a bul tantu ah a tang bawk.
Spain an vannei
La Roja in Costa Rica laka goal sarih an khung chu an dampui a ni ber a. Group stage a tla thei dinhmunah an ding hman.
Costa Rica in Germany lakah minute thum chhung hma an hruai a, hei hi huntawp result nise Spain hi tla tur an ni a. Germany chak an chhawr.
Germany an haw a ngai
Japan lakah an tlawm a, Spain nen an inhnehtawk. An match hnuhnung berah Germany in goal li khung mahse an chetsual tawhna an tuar.
Germany hi 4-2 in an chak a, Kai Havertz chuan goal hnih khungin Serge Gnabry leh Niclas Fullkrug ten goal dang an khung.
Inkhel lehlamah Spain tlawm lo se Germany an tling dawn a. Goal difference-ah Japan an khum thei dawn. Mahse midang result a innghat chauh an nih tawhna chu an tuar.
Germany tan match hmasa berah anmahni hnehtu Japan ngam loh a pawi a, Spain laka Japan goal sawihlawh tak chu a pawi pha bawk.
Goal difference-ah Spain an phak loh avangin an tla.