Morocco in Group F-ah Canada lakah hnehna pawimawh an chang a. Kum 36 chhunga a vawikhatna atan World Cup knockout stage an khel dawn.
Atlas Lions tia hminglem an vuah Africa hmar lama awm ram hian kum 1986 khan round of 16 an lut tawh a. An group-ah vawi hnih chak thei awmchhun niin an sang ber.
Ningani zana Al Thumama Stadium a inkhelah minute 4-naah Canada goalkeeper Milan Borjan a chesual. A goal atang tlan chhuakin ball a pe chhuak a, mahse Hakim Ziyech zawnah ball pe in ani in goal ruakah metre 27 a hla atangin a pet lut.
Minute 23-naah an goal hnihna a lut leh a. Achraf Hakimi ball siamsak tha tak chu Youssef En-Nesyri chuan an goal hnihna turin a khung.
Morocco tlarhnung in pherh lai a nei ve thova. Minute 40-naah Nayef Aguerd chesual ve in an lamah a ti lut a, Canada in goal khat an nei ve.
Morocco hian round of 16-ah fiahna lian tak an hmachhawn dawn a. Kum 2010 champion Spain nen an inkhel ang.
Croatia pahnihna
Kumin World Cup a beisei pha lo ber zinga tel ngei tur chu Belgium an ni a. Kum 2018 a pathumna hauhtu ram in knockout stage khel dawn lovin Croatia laka goal an khung theih loh an tuar.
Ahmad bin Ali Stadium-ah Croatia in tling turin point khat bak an mamawh lova. Goal khung ngei mamawh Belgium in chance nei hnem mahse an khung theih miau loh avangin an haw a ngai.
Substitute Romelu Lukaku chu second half-ah dah luh niin goal khung ngeina tura ngaih tum li a hloh a. Inhliam avanga chawl striker hi a fit tha tawk lo tih chiang takin a hmuh theih.
Team chhung boruak a tha lo nia thuthang ngah tak Belgium hian tun tournament chhungin goal khat chiah an khung.
Hetihlai hian Zlatko Dalic-a pawlte hian round of 16-ah Japan an hmachhawn dawn.