Aizawl : ZPM thalaiin Bawngkawn leh Vaivakawn inkâr kawng chhawng siamna atan DPR siam a la ni lo nia sawiin, feasibility report siamna atan Rs. nuai 82 sen a nih tawh thu leh feasibility report siam turin Telecommunication Consultant India Ltd. rawih an nih thu an sawi.
Bawngkawn leh Vaivakawn inkâr kawng chhawng siam tur chungchang RTI-a an zawhna chhannaah DPR siam a la nih loh thu leh feasibility report siamna atana Rs nuai 82 sen a nih tawh thu te, feasibility report siam tura Telecommunication consultant India Ltd. rawih an nih thu te tarlan a nih thu ZPM thalai chuan an sawi a. RTI-a zawhna chhannaah kawng chhawng siam ṭan hun tur hriat a nih loh thu leh thawh ṭan hun tur report pawh sorkârin a la pêk loh thu an tarlang.
ZPM thalai chuan “2018 inthlanpui dawna MNF-in an au hla, traffic jam awmlohna khawpui leh kawng chhawng hmelhmang vawiin thlenga Aizawl khawpuia hmuh tur a la awm lo hi mipui bumnaah kan ngai” an ti a. Sorkârin kawng chhawng siam hun tur a la hre lo chu beidawnthlâk an tih thu sawiin, MNF sorkar chu 2018 inthlanpui dawna an thutiamte boruaka tham ral tir mai lo tura an ngen thu an sawi bawk.