Krismas leh Kumthar thleng tur denchhena ruihhlo do beihpui thlakna kalpui mekah Excise & Narcotics Department, Champhai leh Khawbung Branch YMA tangkawp buatsaihin nimin khan Khawbung Community Hall-ah ruihhlo hman khawloh laka inven dan inzirtirna, Anti-Drugs Awareness Campaign chu ‘Say NO to drugs and YES to life’ tih thupui hmangin neih a ni.
He hun hi Vanlalvura Ralte, Asst. Comissioner of Excise & Narcotics Department, Champhaiin hmanpuiin chuan ruihhloin thalaite a run nasat thu a sawi a. Kalkhawmte chu ruihhlo laka inthiar fihlim tur leh mi dangte zirtirtu nih tum turin a chah.
Ruihhlo hman khawloh leh a nghawng tha lote zirtirna kalpui mek zelah Excise & Narcotics Department, Champhai hian hma a la zel a, hunpui vuakveta Anti-Drugs Awareness Campaign Special Drive kaltlang hian an district chhung hmun thlan bikahte zirtirna an nei chho zel a ni.