Union health ministry chuan Thawhtanni khan Maharashtra-a Zika virus kai hmuh a nih avangin a enpui turin team a tir.
Pune district-ah Zika virus kai hi hmuh niin Maharashtra-a a kai hmuh hmasak ber a ni.
Kawng hrang hranga thiamna nei telna team hian state sorkar thawhpuiin a darh loh nan hma an la ang.
Central team-ah hian mi pathum awmin Regional Director, Pune-a mi, public health expert; Lady Hardinge Medical College, New Delhi-a gynecologist from leh National Institute of Malaria Research (NIMR), ICMR, New Delhi-a entomologist te an ni.
State health department nena thawkhovin a hmunah thil awm dan an en ang a, Union health ministry Zika virus laka hma lak dan tur a duante kalpui a ni em tihte an enpui dawn thu home ministry-in thuchhuah a siamah a tar lang.
Pune district-a Purandar-ah, Belsar khuaa nu kum 50 mi chuan Zika virus a kai tih hriat a ni a. Doctor-te chuan natna lang chhuak langsar a nei lem lo va, a chhungte phei chuan engmah na an la nei lo tih an sawi.
“July chawlhkar hmasa ber atang khan Belsar khuaah hian khawsik an awm nual a. Sample laksak niin endik tura thawn a ni a, mi 21 chuan Chikungunya an lo vei a, pathumin Dengue kaiin pakhat hian Zika leh Chikungunya a lo vei kawp a ni,” tiin Maharashtra-a Surveillance Officer Dr Pradip Awate chuan a sawi.
Tual chhung thuneitute chuan Zika virus kai an awm tih an hriat veleh a darh loh nan hma an la nghal a. Hmeichhe chenna khua bakah hian an chenna atanga kilometre nga bialah natna hlek nei apiang chu an endik nghal a ni.
Inrinni khan Maharashtra health department-a quick response team hi khuaah hian thleng tual chhung mite hnenah invenna tur leh Zika chungchanga hriat tur pawimawhte pawh an hrilh nghal.
Zilla Parishad chief executive officer Ayush Prasad chuan Zika hi coronavirus anga thihna thlen mai thei a ni lo vam hei vang hian chiai a ngai lo niin a sawi.
Maharashtra hma hian Kerala-ah pawh Zika virus kai hi kuminah hmuh a ni tawh a, mi 63-in an vei tawh a ni.