Aizawl : Kum 1984 a Bhopal Gas vanga chhiatna rapthlak taka nunna chan te puala kumtina hman thin – National Pollution Control Day chu nimin khan MINECO tualzawlah hman a ni a, he ni denchhen hian Single-Use-Plastic Free Day hman a ni bawk.
Environment Forest & Climate Change Minister TJ Lalnuntluanga’n he hun hi a hmanpui a. Chief Secretary Dr. Renu Sharma kaihhruaiin hman khat daih plastic (Single Use Plastic) tihremna kawnga tan la turin kalkhawm ten thu an tiam a, plastic aiawh (alternative) siamtu ten an thilsiam te an phochhuak bawk.
TJ Lalnuntluanga chuan thiamna leh mihring pung zelin khawvel hmasawnna nasa taka a thlen thu sawiin, ram leh khawvel hmasawnna te chuan pollution a thlen ve zel avangin inven thiam erawh a tul thu a sawi a. Boruak, tui leh ri bengchheng ven nana dan siam te chu ngaipawimawh thar tura mitin ngenin, Assam hnuaia awm lai atang tawha Mizoram sorkarin ramngaw te humhalh tura nasa taka tak a lak tawh thin thu a sawi.
Khawpui chhunga ramngaw siamna tur – Nagar Van scheme chu municipal area chauh huam tura duan ni mahse, Mizorama district capital zawng zawng te huam tir tura central sorkar an ngenna chu tihhlawhtlinsak an nih thu Forest Minister chuan a sawi a. Mihring pung zelah tui thianghlim mamawhna a san zel thu leh hemi kawngah hian riverine catchment area te humhalh nan Japan sorkar nen tangkawpin JICA project hnuaiah hmalak thuai a nih tur thu a sawi.
Hmankhat daih plastic te chu luidunga nungcha ten an tawrh nasat avangin a tihrem kawngah khawvel huapa tanho ngai a nih thu TJ Lalnuntluanga chuan a sawi a. Ramdang te nen a hnual zawnga intehkhin lova, rilru dik pu chunga a tha lamah chuan entawn hreh lova tan lak a tul thu a sawi.
Bawlhhlawh paih leh sawngbawl kawngah lungrual tak leh inpumkhat taka mipuite rilru chawisan zel a tul thu TJ Lalnuntluanga chuan sawiin, “zalenna kan duh angin midangte pawhin an duh ve tih hre thar theuha, leilung tihbawhhlawh thei heng thil thalote tihtawp kawngah tan kan lak theuh a ngai a ni” a ti.
Chief Secretary Dr Renu Sharma pawhin pl- astic aia hman tur siamchhuah te phochh- uah a ni chu lawmawm a tih thu sawiin, jemi kawnga sorkar deptt. hmalakna te a fak a. MINECO tualzawlah chauh ni lo, vawiin lamah Millenium Centre tualah te phochhuah a nih tur thu a sawi.
Central Pollution Control Board-in hmankhat daih plastic tihtawp kawnga hma la tha state a thlanchhuahah Mizoram chu rampum huapah 12-na leh hmarchhak state zingah 1-na a nih thu Chief Secretary chuan sawiin, chhinchhiahtlak a nih thu leh ram leilung venhimna atana tan zual sauh sauh zel a pawimawh thu a sawi bawk.