Aizawl: Ram chhung hmun dang rualin nimin khan Mizoramah National Pollution Control Day 2022 hman a ni a, he ni denchhen hian Single-Use-Plastic Free Day hman a ni bawk.
MINECO tualzawla National Pollution Control Day hmannaah hian khuallian, Forest Minister TJ Lalnuntluanga chuan boruak, tui leh ri bengchheng ven nana dan siamte chu ngaih pawimawh thar a tul thu sawiin, “Assam hnuaia kan awm lai atang tawhin Mizoram sorkarin kan ramngawte humhalh nan nasa takin tan a lo la tawh thin,” a ti.
Hemi kawnga tlawmngai pawl leh sorkar hmalaknate pawhin ngaihhlut a hlawh chho zel chu lawmawm a tih thu forest minister chuan a sawi.
Khawpui chhunga ramngaw siamna tur – Nagar Van Scheme chungchang sawi bawkin, “He scheme hi municipal area-ah chauh huam tur a duan ni mah se, Mizoram district capital zawng zawngte huam teltir tura central sorkar kan ngenna chu tihhlawhtlin a ni,” a ti bawk.
TJ Lalnuntluanga chuan mihring pung zelah tui thianghlim mamawhna a san zel thu leh hemi kawngah hian riverine catchment area-te humhalh nan Japan sorkar nen tangkawpin JICA project hnuaiah hma lak thuai a nih tur thu a sawi a, hman khat daih plastic-te chu lui dunga nungchaten an tuar takzet avangin a tihremna kawngah khawvel huapa tanho ngai thil a nih thu a sawi.
Bawlhhlawh paih leh sawngbawl kawngah lungrual tak leh inpumkhat taka mipuite rilru chawisan zel a tul thu sawiin, tute pawhin zalenna an duh angin mi dangte pawhin an duh ve tih hre thar theuha leilung tihbawhhlawh thei heng thil tha lote tihtawp kawngah tan la theuh turin kalkhawmte a sawm a ni.
Single Use Plastic Free Day-ah hian college zirlaite pualin Govt. Hrangbana College-ah hun hman a ni a, chawhnu lamah Mizoram Pollution Control Board kaihhruaiin Chawnpui High School-a EcoClub naupangte leh Chawnpui Local Council-te leh Save Mizoram River-te nen Chawnpui vênga Tuikual lui chu tihfai bawk tur a ni.