PC party President Vanlalruata’n PC party chuan zu ṭha zawrh a ngai an tih thu a sawi a. ”Zu hi fak leh sawimawi chi a ni lova, khuahkhirh ngai a ni a. Zu chhia phei chu hlauhawm tak a ni a, tihbo ngai a ni,” a ti.
PC party President chuan thuthar thehdarhtute kawmin he thu hi nimin khan a sawi a. Mizoramah zu chhia a tam hle nia a lan thu sawiin, thalai leh la valai tak tak mu hlum tam tak chu zu chhia an in thu sawi tel a nih deuh zel avangin zu chhe in avanga thi an tam hle nia a lan thu a sawi.
Zu chhe in avanga thi an tam nia lang chu ngaihthah chi a nih loh thu Vanlalruata chuan sawiin, rang taka zirchian leh hmalak ngai a nih thu a sawi a. “Zu chhia tibo turin khuahkhirhna felfai leh endikna rintlak hnuaiah zu ṭha siam a ngai” a ti.
Vanlalruata chuan “Mizoram hi India rama chhiah hmu tlem ber state kan ni a, zu chhiah pawh kan hmu tlem hle a, chutihlaiin zu khap bur anga kan insawi lai hian tunhnai kum 30 chhung hian kumtin zu chhiah kan hmu ziah” a ti a. Kum 2013-14 (RE)-ah Rs vbc 250; 2014-15 (Actual)-ah Rs vbc 270; 2015-16 (RE)-ah Rs vbc 39.42; 2016-17 (Actual)-ah Rs vbc 70.68; 2017-18 (Actual)-ah Rs vbc 64.96; 2018- 19 (Actual)-ah Rs vbc 63.91; 2019-20 (Actual)-ah Rs vbc 2.55; 2020-21 (Actual)-ah Rs vbc 0.85; 2021-2022 (RE)-ah Rs vbc 0.70 leh 2022-23 (RE)-ah Rs vbc 0.79 zu chhiah hmuh a nih thu a sawi.
PC party President Vanlalruata chuan zu chhiah chungchang chu sawibelhin “India sorkar aṭanga kan pawisa dawnah hian zu chhiah a tel kumtin bawk,” a ti a. “Kan dinhmun dik tak enin kan ramah hian dan hnuaiah PC party chuan zu ṭha siam leh zawrh a ṭul tawh kan ti takzet a ni,” a ti bawk a ni.