Aizawl: ZPM leader Lalduhoma chuan he laia Pathian ram din theihna tura pawimawh ber chu sorkar tha neih a ni tiin, “Kohhran tha neih aiin sorkar tha neih hi ram tan a pawimawh zawk,” a ti.
Tuikum constituency huam chhunga khaw hrang hrang tlawha vantlang inkhawm neihahte thu sawiin Lalduhoma hian Judate chanchin thlirin puithiam lalin a bawhchhiat avanga an ram chhe ta tih hmuh tur a awm ngai lo a, puithiam lalin Pathian thu a awih em a, an ram a lo ding chhuak ta tih hriat tur a awm ngai lo nia sawiin, “An lalte zel a ni. An lalten an bawhchhiat chuan puithiamten an dang zo ngai lo a, an sakhua nen a chuai vek thin,” tiin, lalin Pathian a hriat leh hunah tun dinin an awm a, thuneitu zawk kha a pawimawh thin niin a sawi.
Lalduhoma hian Thawhtanni leh Inrinni inkarah hian Zoram politics-ah Pathian ram thlentir hi ZPM-in an ngaih pawimawh ber a nih thu a sawi a, “Chu chu kan ram siam thatna tur a ni. Kan Pathian hian inthawina aiin dik taka rorel hi a lawm zawk a, rorelna dik awm chuang si loa sakhuana kalpui vak hi Pathian a lawm lo, chu aia duh zawk chu a nei a, chu chu sorkar tha a ni. Chu sorkar tha din tur chuan a mawhphurtute kan ni,” a ti.
ZPM leader hian Pathian hian rorelna fel tun din a nih chuan malsawmna tam tak a tiam zingah hriselna a tel nia sawiin, sorkar tha din a niha a thupekte zawm chuan lei taksa hriselna hi a tiam a. Tuna ram dinhmun thlir erawh chuan Mizote hi hrisel lo tak mai, khawvela dam rei lo ber hnam nen dam hun chhung inang nia sawiin, “Pathian duh danin ro kan rel lo a niang; Pathian ram a chengte chanvo hriselna hi kan chang lo reng reng a ni,” a ti bawk.
“Bible chuan, ‘Pathian ram dintute in nih chuan in zingah rethei in awm hauh lo ang,’ min ti a ni. Vawiinah chuan kan rethei em em a, Krismas lo thleng tur pawh huphurh chhungkua tam tak kan awm a ni. Mi harsa leh rethei zawkte dinhmun hi tam tak hi chuan kan hriatpui lo zawk a ni,” tiin, sorkar hrawn mek hian kuttuma eizawngte a kaihhruai dan a dik lo a, thingtlang lo neih bansan tur an tih atanga tun thleng hian budget-ah cheng khat mah an dah ngai tawh miah lo niin a sawi.