Bangladesh sipai leh Kuki-Chin National Army (KNA) an inkah avanga an sahimna zawnga Parva III khuaa tlan lut mi 295 an awm mek a, Bangladesh atang luh belh tum mi 100 erawh thawn kir an ni; vawiin atangin raltlan awmna tur relief camp sak tan a ni ang.
Parva III Refugee Organising Committee Chairman Gospel Hmangaihzuala’n The Zozam Times hrilh danin Zirtawpni tuk khan Bangladesh-a Chittagong Hill Tracts khaw thenkhat atangin mi 120 bawr vel chu Mizoramah luh an tum a, ramria duty BSF-ten luh an rem ti lo a, Tuichawng Group YMA hruaitute pawhin raltlante chu Mizorama luhtir turin ngen mah se BSF hian rem ti loin, Bangladesh-ah an kirtir leh vek a ni.
Hetihlai hian Bangladesh raltlante tlawhtu, MSU hruaitute chuan Zofate Inpui pana luh tum mek mi 117-te BSF-ten an lo dang chu pawi an tih thu leh an lo luh leh vek theih nan theihtawp chhuah an tum thu an sawi a, Mizoram sorkar chu Bangladesh atanga Zohnahthlak Mizorama lut mekte ngaihsak zual turin an ngen tih leh Zofa zawng zawngte tan Mizoram chu an inpui a ni tih India sorkarin hria se an duh thu an sawi bawk.
MSU hruaitute hian nimin khan raltlan awmna, Parva III khua an thleng a, Refugee Organising Committee hruaitute hnenah raltlan unaute tanpuina tur sumfai Rs. 10,000 an hlan a ni.
Nimin tlai thleng khan Parva III-ah hian raltlan mi 295 an awm mek a, an awmna tur relief camp chu Thawhtanni atangin sak tan tum a ni.