El Salvador President Nayib Bukele chuan Soyapango khawpuia gang-te chhut chimih tuma beihpui an thlak mekah sipai 10,000 chuang tirh luh an nih thu a sawi.
Khawpui pawhtu kawngpuite chu dahchah vek an ni a, special force-ten ina lut lawrin gang member an dap bawk.
Officer-ten khawpui chhuahsan tumte lo tidingin an lehkha neih an lo endik zel.
Beihpui thlakna hi kumin kumtir lama tharum thawhna thleng nasa lutuk titawp tura gang-te tihrem tumna kal zel a ni.
Justice minister chuan mi 12 man an ni tawh tih a sawi.
Soyapango hi El Salvador-a khawpui lian ber zinga mi niin mi 2,90,000 chuang an cheng a. An khawpui, San Salvador atanga khawthlang lam km 13 chauhva hlaa awm niin gang chet tamna hmun a ni.
“Tun dinhmunah chuan Soyapango chu hual vek a ni rih,” tiin President Bukele chuan Twitter-ah a tar lang a. “Police leh sipai atanga extraction team-in gang member-te chu a mal malin an la chhuak zel,” a ti.
Mi pangngai tan ‘hlauh tur a awm lo’ tih a sawi a, beihpui thlak chu ‘mi sualte laka neih a ni a, khua leh tui tha pangngai tan a ni lo’ tih a sawi.
Sorkarin thlalak a tihchhuahah chuan ralthuam tha tak tak nena inthuam sipaite chu khawpui daiah an awm khawm thup.
Mi cheng pakhat, Guadalupe Perez chuan AFP news agency hnenah sorkar hmalakna chu anmahni barakhaihtu lawmawm tak a nih thu a sawi.
“An zawng che a, i chenna hriat tumin i lehkha an ensak ang che, kan himna tur vek zawk a ni,” tiin kum 53 mi hian a sawi.
March thla tawpa Bukele-a’n emergency a puan atang khan mi maktaduai 6.5 chenna ramah hian mi 58,000 chuang man an ni tawh.
Mihring dikna chanvo humhalhtu pawl chuan sorkar leh sipaite chet dan chu an sawisel deuh va. Police-te hnena warrant tel lova mi an rinhlelh zawng man theihna pek an ni chu an duh loh langsar a ni.
Hetih lai hian Bukele-a thlawptute chuan March 26-a mi 62 zet thahna a thlen hnuah leh tharum thawhna dang thleng fo avangin hetianga chet chhuah hi an mamawh niin an sawi ve thung.
Tun hnaia Central American University (UCA)-in ngaihdan a lakah chuan Salvadoran zinga 75.9% chuan emergency puan hi an thlawp a ni.