Aizawl: Aizawl Smart City Ltd. MZP Inter High School Quiz Zirtawpni kalta zana zawh fel takah St. Paul’s Higher Secondary School (Malsawmsangi Hmar leh T. Lalmuanpuia) pakhatna an ni.
Inter High School Quiz-ah hian sikul 15 an tel a, St. Joseph Higher Secondary chu pahnihna niin, Kids Care School pathumna an ni a. Pakhatnain trophy, thuziak leh lehkhabu hrang hrang bakah Rs. 30,000 an dawng a, pahnihnain trophy, thuziak leh lehkhabu hrang hrang bakah Rs. 20,000 dawngin, pathumnain trophy, thuziak leh lehkhabu hrang hrang bakah Rs. 10,000 an dawng thung.
Aizawl Smart City Ltd. MZP Inter High School Quiz kharna hun hmanpuitu, Higher & Technical Education Minister Dr. R. Lalthangliana’n, “Mizote hian fakawmna leh thatna tam tak kan neih rualin tan lakna tur tam tak kan nei,” tiin, khawvel chu thawkrim leh taima, mi vantlang chung lamte tan lo chuan a harsa a, ti mai mai tan hlawhtlin a har tih sawiin, tih tak takna nen, a nawlpui aia sang nih tum loh chuan hlawhtlinna a awm loh thu a sawi.
Dr R Lalthangliana chuan, “Zirlaite hian mi tih theih ang an ti ve thei a ni, tih ngaihtuahna huaisen an put loh chuan, competitive khawvelah an hniam zel ang,” a ti bawk.
MZP President Lalnunmawia Pautu-in Inter High School Quiz chu MZP-in kum 2010 atangin kum tin an buatsaih thin tih sawiin, he inelnaa tel zirlai leh a thiam bikte chu matric exam-ah pawh a titha ber berte an nih fo thu a sawi a. Zirlaite chu social media khawvelah thu dik lo post leh thehdarh kawngah fimkhur tur leh mahni zirlai dah hmasa zel turin a chah a ni.