Aizawl: ZPM Leader Lalduhoma chuan Tuikum bial chhung khaw hrang hrang tlawhin Zirtawpni zan khan Chhingchhip Mualpui venga vantlang inkhawm buatsaihah thu a sawi a. Kut hnathawktute mangang aurawlin ZPM a kai tho niin a sawi.
Lalduhoma hian ram dinhmun thlir hian kut hnathawktute an thang lo a, loh theih loh avangin thingtlang lo neih a ngai a, tuna ram inrelbawl dan leh hun kal tawka inkaihhruai dan en let chuan, kuttuma eizawngtute hian sorkar an nei lo tluk niin a sawi.
Thingtlang lo neih bansan nan thlai chi hrang hrang chin tir tawh thin mah se, a hralhna a mumal loh avangin rim takin thawk mah se, a hlawhtlinna tak tak an hmu ngai lo nia sawiin Lalduhoma hian, “A taima apiang beidawnna ramah min siam ta a nih hi. Mipuite chu an sual vanga thingtlang lo neih hi bansan duh lo an ni lo a, an bansan thei rih lo a. Mipui tam zawk thingtlang kuthnathawk kan nih miau chuan ram hian hma rawn sawn ve mah se, kan chhawr ve tak tak lo a ni,” a ti.
ZPM leader hian thingtlang kut hnathawktuten thingtlang lo neih an bansan theih loh chhung hi chuan ZPM in thingtlang lo neitute tan budget-ah sum eng emaw zat dan a, a theihna kawnga tanpui an tum dawn nia sawiin, “Keini chuan kuthnathawktute chhanchuah theihna turin bana kaih (hand holding) policy kan nei. Pakhatnaah chuan thlai thar kan lei dawn a. Puan lawk kan nei leh dawn a, kan mi thiamte kutah kan dah a, an zirchiang mek a ni. Tuna kan sawi bak pawh hi Pathian zara sorkarna kan lo chang a nih chuan sum awm dan azirin a rate puan sa hi tih belh zel kan tum a ni,” a ti bawk.