Iran-a duh lohna lantir liantham takah hian a puipa ber ber chu hmeichia an ni a, Amini-i a thih hnu lawk atanga tan niin a hming leh a thlalak chu an ram chhung leh pawnah pawh a darh nasa hle.
Hmeichhiate hian an lu tuamna an hal a, thenkhat phei chuan an lu an ziat kawlh a. ‘Hmeichhia, nunna, zalenna’ tih chu an auhla pui ber a ni.
Iranian thuneitute chuan United States, Israel, Europe-a ram liante bakah Saudi Arabia chu hetianga an rama mipuiin duh lohna an lantirah inrawlh leh an fuih phurah a puh a. Amini-i thihna chu ‘chhuanlamah’ hmangin an ram leh an innghahna chu sawi nghinsak an tum niin an sawi.
Iran-ah hian lu tuam, hijab hi kum 1979-a Islamic revolution a thlen atang khan hman tan a ni a, thuneitute ngaih pawimawh ber pakhat a ni zui a, tihtawp an tum loh thu pawh vawi tam an sawi tawh thin.
Heti taka Amini-i thihna avanga hmeichhia leh mipuiten duh lohna an lantir hnuah hian inchei dan tur an zam chu tihdanglam hret an sawi ri ve tan a; mahse, an ti dawn ngei em tih chianna erawh a la awm lo.
Inthuam dan zawm lote viltu tihtawp a nih rual hian tual chhung thuneitu thenkhat chuan artificial intelligence emaw, camera emaw hmanga vil zuitu tur dah a ni dawn tih an sawi a, dan zawm lo chu pawisa chawitir an ni dawn tih thlengin an sawi a; mahse, hei pawh hi an kalpui ngei dawn em tih fiahna a awm chuang lo.
Tun hnaiah lirthei khalhtu, hijab dan zawm lote zingah pawisa chawi an awm nual tawh a, warning pek an ni bawk a. An lirthei chhinchhiah niin man nawn leh an nih chuan hremna na zawk an tuar thei dawn a ni.