Vawi 1000 a inkhelhnaah, khawvela footballer ropui bera chhal Lionel Messi chuan a tih fo tawh thin a ti leh a. An ram chakpui in Argentina in World Cup quarter-final an lut.
Inrinni zanah Al Rayyan a Ahmad bin Ali Stadium-ah Argentina in Australia hmachhawnin round of 16 an khel a. Messi hian World Cup knockout stage a a goal hmasa ber khungin a team tan hma a hruai a. Julian Alvarez chuan goal dang khungin 2-1 in Argentina an chak.
Vawi 1000-na
Kum 35 mi ni tawh Messi-a’n a World Cup vawi nga na a khel. Record ropui tam tak a neih tawh zingah erawh knockout stage inkhelah goal a la khung ngai miah lo.
Minute 35-naah an hmahruaina goal mawi takin a khung a. Defender ten an hual thup chungin goal a khung.
Ram tana vawi 169 a inkhelhna chiah a ni a, goal 94 a khung tawh.
Professional football a khelh hnuah ram leh club tana a inkhelh vawi 1000-na chiah a ni bawk.
Heng atang hian goal 789 a khung tawh a. Qatar-ah hian top scorer nihna chelhtu zingah a tel mek.
Australia in a tawp thleng beih an tum. Amaherawhchu team pahnihte thiamna a inthlau tih a hmuh theih.
Goalkeeper Mat Ryan chetsual zarah Julian Alvarez chuan Argentina goal hnihna a khung a. Socceroos hian na taka goal nawr nei lo mahse minute 77-naah goal an khung ve a. An substitute Craig Goodwin ball pet chu Enzo Fernandez-a’n dang pialin goal a lut a. A tawp thlenga inkhel tihmuhnawmtu a ni.
Australia tan Aziz Behich chuan an si phurh a sut teuh a. Argentina player pali bum tlangin goal hmaah Lisandro Martinez leh Emiliano Martinez ten an dang hman.
Quarter-final a an hmachhawn tur Dutch team thlirlawkin Argentina coach Lionel Scaloni chuan, “Team ropui pahnih an ni a, inkhel hmuhnawm leh ropui tak a ni dawn. Tla zawk an awm a ngai tur hi an uihawm dawn, chutihrualin keini kan tlin zawk ngei ka beisei.” tiin a sawi lawk.
Dutch tlangvalte thiam zawk
Netherlands in inkhel tawp dawn lamah na taka goal bawhna tuarchhuakin hnehna an chang a. 3-1 in USA lakah round of 16-ah an chak.
Khalifa International Stadium-ah Christian Pulisic goal khung tur chu Dutch goalkeeper Andries Noppert chuan inkhel tir lamah a dansak a. Hei hi America tan a pawi.
Minute 10-naah Denzel Dumfries thawhrah sengin Memphis Depay chuan USA goal khatna a khung a. Halftime dawnah Dumfries siamak bawk Daley Blind chuan a khung ve leh.
USA in minute 76-naah goal an khung a. Haji Wright chuan mak angreng takin ball a thai goal. US team phur hman mahse an boruak a chuai lehnghal thuai a. Huntawp hma in Blind-a ball siamsak atangin Dumfries chuan an goal thumna a khung.
“Kan ruahmanna tha kan chakpui a, USA kha an insiamrem lo kha hnehna kan channa chhan lian tak a ni.” Netherlands coach Louis van Gaal chuan a ti.