UFC welterweight title lo chuh tawh Stephen ‘Wonderboy’ Thompson chuan a kum tam tawh mahse mixed martial arts-ah a hun a la liam lo tih a lantir a. Hnehna tha bika chhiar tel theih tur changin Kevin Holland a hneh.
Pathianni tukah Orlando, Florida a Amway Center-ah UFC Fight Night buatsaih a ni a. Main event-ah hian welterweight title inchuhna a awmze nei pha ngei tura ngaih bout thlengin Holland nen an intum.
Round li chhunga dingchunga kut inthlakna hmuhnawmah Holland-a coach Bob Perez chuan round li na zawh, round nga na tan leh hma in bout a titawp a. Holland chu a kut dinglamah hliam na a neih avangin a inlan chhunzawm thei tawh lo.
Kum 39 mi ni tawh Thompson hi December 2020 hnua a chak leh hmasak ber a ni a. Hemi hma hian Gilbert Burns leh Belal Muhammad te lakah a tlawm.
Main event hmuhnawmah round hmasa pahnihah fighter pahnihte kut inthlak tawn a hmuhnawm a. Round thumna leh round li naah erawh Thompson-a thiamna langin a khingpui a thunun bakah awmze nei in kut a thlak ngun zawk hle.