Iran chuan thla hnih zet mipuiten duh lohna nasa taka an lantir hnuah morality police chu an titawp dawn tih prosecutor general chuan a sawi.
Duh lohna hi Tehran khawpuia morality police-in a inchei danah an ram dan a zawm lo nia puha Kurdish nula kum 22 mi, Mahsa Amini-i an man hnu lawka a thih avang atanga intan a ni.
Inrinnia hun a hmanna pakhatah prosecutor general Mohammad Jafar Montazeri chuan ‘buaina an tawh mek tihtawp nan’ hetiang hian an ti dawn niin tual chhung chanchinbute chuan an tar lang a, morality police hmalakna chu a tawp ta tih a sawi a. Mipuiin duh lohna an lantir hi Iranian thuneitute chuan ram dang mite fuihphur vang niin an puh bawk.
Morality police hi ‘dan lam thuremna nen inzawmna a nei lo va, tun hmaa din tannaah bawk tihtawp leh a ni’ tiin tihtawp a nih chhan an zawhnaah a chhanna an tar lang bawk.
Patrolling unit an tih, sorkarin khawtlanga ‘nun dan a him em?’ tih vil tura dinnte chu tihtawp a ni ve dawn em tih sawi a awm lo va. Morality police hi tihtawp hlen a ni dawn em tih Montazeri hian a sawi lo bawk.
Heng bakah hian sorkarin inchei leh inthuam dan tur a zam chu hlih a ni ve dawn em tih pawh hriat a ni lo.
Morality police an tihte hi an van var leh hringin khawpui lianah an tlan kual a, sorkarin inthuam dan tur a zam zawm lote vaiin inthuam dan tur an hrilh thin a. Tihluih deuh ngai chu ‘re-education’ centre an tihah an la thin a; mahse, hengho hi Tehran leh khawpui lian dangah hmuh tur an awm dawn ta lo a ni.
Centre an tiha Amini-i an hruai hnua a awm lai hi thuneitute chuan security camera footage an tichhuak a. Ni thum lai nikhawhrelova a awm hnuah a bul hnai damdawi inah a thi a ni.
Coroner’s office-in a thih chhan an sawiah chuan a hma atanga a dinhmun tha lo sa niin a tar lang a, a chhungte erawh chuan morality police hian nasa takin kut an thlak vang nia an ngaih thu an sawi.