Indonesia-a Mount Semeru tlangkang a inphuh chhuak thar leh mek a, vansangah meivap nasa taka phuh chhuakin an ram thliarkar lian ber, Java-a a awmna hnaiha mite chu inthiar chhuak tura tih an ni.
Thuneitute chuan tlangkang inralrinna chu a sang berah an dah a, hemi awmzia chu la che chhunzawm zel thei a ni tihna a ni.
Pathiannia tlangkang inphuh chhuakah hian hliam tuar an awm hriat a la ni lo va; mahse, tlang atanga km 8 huam chhungah tumah awm rih lo tura hriattirna tihchhuah a ni.
Mount Semaru kang inphuh chhuak leh avang hian Japan pawhin an ram chhim tawp thliarkar tan tsunami warning a tichhuak ve bawk.
Indonesia-a Center for Volcanology & Geological Hazard Mitigation (CVGHM) thupuangtu chuan a hlauhawm tih hriattirna chu ‘three’ atanga ‘four’-ah an kaitir tih a sawi a, hei hi mihring chenna atana a hlauhawm phak vang a ni tih an national broadcaster hnenah a sawi.
National Disaster Mitigation Agency (NDMA) thupuangtu pawhin metre 3,676-a sang tlangkang inphuh chhuakah hian ‘lei sa tak tawlh’ a awm theih avangin a hlauhawm tih a sawi ve bawk.
Tlangkang phuh chhuak leh fur ruah inpawlh chu a bulhnai khuaah a tla tan tih a sawi a, hei vang hian insaseng turin mipui an ti a, naupang leh kum upate ngaih pawimawh hmasak an ni a. A bul hnai, East Java province-a mite chu an insaseng tan tih a sawi.
Thuneitute chuan Mount Semeru hi an ram sanaa Pathianni zing dar 2:46 (India-a zing dar 1:16)-ah a kang a inphuh chhuak tan tih an sawi.
Indonesia hi Pacific Ocean-a ‘Ring of Fire’ an tiha awm niin tectonic plate pahnih intawhna lai a ni a, a hnuai lei hi a chet reng avangin tlangkang leh lirnghing insiam duhna hmun a ni.
Semeru hi ‘The Great Mountain’ tia sawi a ni bawk a, Java-ah chuan tlangkang thin zinga a sang ber niin a kang inphuh chhuak zing ber zinga mi a ni bawk a. Kum khat awrh liam taah pawh khan inphuh chhuakin mi 50 vel an thi a, kawtthlerte chu chirh leh meivapin a khuh vek a ni.
An ram khawpui, Jakarta atanga khawchhak lam km 640 vela hlaa awm, Java thliarkar chhim lam hi tun hnaiah lirnghingin a sawi fo bawk a. A hnaivai ber chu thla hmasaa nghing kha niin mi 300 chuang an thi.