- Lallunghnema, Charity Lodge
Consumer Huang chhiartu zawng zawng te chibai tha ber ka buk leh a che u. In dam lo sei mawlh teh se.Hlim takin hun hman tum theuh ila, kan dikna leh chanvo neihte hi hman tangkai i tum zel ang u.
Lawkin….Aizawl khawpui leh District Capital-ahte chuan December ni 1 atang LPGas Home Delivery tih vek tura hmalak a ni ta hi a lawmawm takzet e.Kan tanrual erawh a ngai hle.Chapter thar kan keu mek e.He scheme tha tak hi lo hlawhchham se,tu mawhphurhna nge ni ang!
Ngun takin han ngaihtuah vang vang la, Bazar-naa i mamawh i lei khan i lungawi tak zet em? Hlim takin i in i pan thei em? I thil lei chu i chik thin em? Maximum Retailed Price i ngaipawimawh em? MRP aia sang hlirin em ni thil i lei thin. Taxi i hman khan sawrkar rate in em ni i hman? Taxi puten an charge zat apiang i he lovin pawisa i chawi mai thin em ni? In ngaihtuah chiang rawh.
I dawihzep leh hawihhawm luat avanga pawisa i chawi nasatzia te kha i chhut ngai em? Thiam i inti a, fing tawkin i inhria a, consumer right erawh i hriat loh zia te kha zahna chang i hria em? Gas Home Delivery tih tur anih laia ‘a tul lo ve’ lo ti pawlah i tang ve pek em? I fing fu a, rual pawh i pawl khawp mai. Mahse kawlphetha chhit man chawi zat tur pawh i chhut thiam si lo. In buhfai, ration laknaa retailer te Dan zawm tur kha i va hre si lo ve! Consumer i nihna anga ‘justice’ i neih nasatzia kha i chhut ngai em? Mizoram, Kristian ramah hian rinawmna leh dikna a thi sawn mai mai dawn em ni?Dante hi kan palzut mai mai dawn em ni? Hnai lo ve, Kristian ho hi chuan Kristian consumer nih tum ila. Dikna leh Rinawmna te hi kan ngaisang zawk tur a ni. In thlahdah taka sual khawi ngam hi mi fel lo zia a ni a. Rinawmna nen a in laichin ngai hek lovang. Consumer i ni tih hi Consumer Protection Act 2019 chuan a nem nghehsak che a, zalenna leh dikna leh chanvo a pe che a ni.
Tum khat chu Outreach Programme kan hmannaah nu pakhat hian “Hetiang hi ka chhiar peih lo” a ti bawl mai! Leaflet kan sem a, Consumer Right ziahna leaflet a ni a. Kei chuan ‘Ka pi, in chhungkaw mamawh a ni, chhiar ngei ngei zawk rawh. Thawnthu bu leh lehkhabu dang aiin a tangkai zawk, i mamawh ngawih ngawih asin” Ka ti ta chiam mai a. Kha nu kha ka nu a ni lo va, ka lawm hle a ni.
Consumer-te zalen lohna hmun Mizoramah hian at vangin kan chawi belh zar zar a, mawl vangin kan tuar nitin a ni. Thil zuar leh hralhtu kan ngam loh avangin pawisa tamtak kan chawi belh mek a ni. Service petute kan ngam loh avangin fare dikin kan kal ngai hek lo. Service kan tih hi taxi, bus, maxi cab, thlawhtheihna, in satu leh in luahtute etc. an ni. Hengho hian an duh thalin an inchhiar a, an duh hun hunah service charge an ti sang mai mai a ni. Zahna reng an nei si lo.
Outreach Programme kan hmang :
November 24 kha Consumer Advocacy Group din champha vawi 5-na a ni a. Kan sawi thin tawh angin CAG hi India rama mi thiam intel khawmna a ni a. Advocate, PhD, engineer, doctor, professor te an awm a ni. Member hi sang bi tam an ni lo. Mizoramah pawh hian mi thiam an intelkhawm a mahse Mizoram a tawp mai lovin National level-ah member nih a ngai a ni. Mizoramah hian tam tham tak CAG-ah hian an inziak lut mek. Kei hi Co-ordinator ka ni. Pawl chhenfakawm tak a ni chho mek.
Hemi ni hian Outreach Programme hman a ni a. Dawr hrang hrang leh business centre kan tlawh a. Poster siamin leaflet sem a ni. Dawrkai hote nen titi ho na hun tha tak hman a ni bawk. Local newsah LPS chuan min lonpuandak a,kan lawm hle a ni.
Restaurant hrem thu hi :
Consumer Forum pakhat chuan packaging charge Rs. 10/- a dil avangin Burger Eatery chu Rs. 15500/- a chawitir a nih chu. Mizoramah hian Forum hian ti ngam ve ang em? Consumer huaisen kan nei ang em? He thu hi 27/11/2022 Guard-ah tihchhuah a ni. Vai nula Pancy Singh chuan Mohali-a restaurant pakhat Hardys Burger-a mi Fried Chicken Burger chu a lei a. A packed man Rs. 10/- an lo dil ngawt mai a. A pe ngei bawk. Mahse packing charge atana Rs. 10/- an pektir chu dan bawhchhiatna niin a hria a. District Consumer Disputes Redressal Commission hmaah he restaurant neitu hi a khing a. Consumer Commission hian restaurant hi thiam loh a chantir a, Rs. 15500/- a chawitir a ni.
He thu ka ziah chhan chu, in lo huaisen a, in lo harhchhuah theih nan a ni ber. Dan hriat a tawk lo, huaisen a ngai. I thil leia harsatna i tawh chuan CAG pan rawh. I thil hman a that loh chuan CAG hrilh thin ang che. Thawhtanni lo thleng hmasa berah kan titi leh ang.