Inrinni kha pianphunga rualbanlo te ni (International Day Of Persons With Disabilities) a ni a. Mizoram Blind Society (MBS) pawhin he ni pual hian thuchhuah siamin, Mizorama rualbanlo zawng zawngte, sorkar hruaitute leh mipuite duhsakna chibai an buk.
MBS chuan sorkar, kohhran leh NGO ten kawng hrang hranga hma an lakna avangin khawvel ram dangte ang bawkin Mizoramah pawh pianphunga rualbanlo te tan zirna, eizawnna leh hmasawnna kawng hrang hrangah beiseina kawl a eng zel niin an sawi a. Samagra Siksa Abhian kaltlangin School Education department-in rualbanlo ten a thlawna zirna an dawn theih nan elementary education atanga secondary education thlenga inclusive education a kalpui thu te, he scheme hnuaiah hian rualbanlo zirlaite hnenah zirlaibu leh school uniform a thlawna pek thin an nih tu leh stipend pawh pek an nih thu an sawi.
SCERT kaltlangin rualbanlote enkawl dan zirna (B.ED. Special Education) pawh kalpui mek a nih thu MBS chuan an sawi a. Mitdel zirlai ten Primary leh Middle school level-ah school mitdel hawrawp (Bra- ille)-a chhut zirlaibu an neih ve theih SCERT-in hma a la mek niin an sawi bawk.
Mizoram board of school education (MBSE)-in kumin atangin High School leh Higher Secondary School zirlaibu chu mitdel zirlaite tan mitdel hawrawp (Braille)-in a pechhuak tih an sawi a. Mitdel leh rualbanlo zirlai exam-na a ziaksaktu mamawhte tan HSLC leh HSSLC exam-ah amahni ziaksaktu rawihna turin (scribe allowance) a pe niin MBS chuan an sawi.
Social Welfare and Tribal Affairs department-in mitdel zirlai ten textbook leh lehkhabu dangte a tam thei ang mitdel hawrawp (Braille)-a chhut a thlawna an neih theih nan Braille press pawh an din tawh tih MBS chuan an sawi a, tunah hian hna thawh tan a ni tawh niin an sawi.
Mizoram University leh a hnuaia constituent college-a rualbanlo zirlaite tan ham- thatna hrang hrang pekna tur MZU-in provision tha tak a siam tawh thu pawh MBS chuan an sawi a. National Institute for Locomotor disabilities (NILD) Aizawl Regional Centre-in ADIP scheme kaltlangin rualbanlote hmamraw mamawh hrang hrang a thlawna a pek theih reng tawh thu leh Mizoram sorkar hnuaia hna lak apiangin rualbanlo te tan zaa pali hauhsak an nih thu an sawi bawk.