Aizawl : Geology & Mining Minister Dr R Lalthangliana chuan Mizoramah mining lam hi an thawh that chuan ram hmasawnna thlen theitu a nih thu a sawi.
Chawlhkar kalta Zirtawpni zan khan Luangmuala Geology & Mining Directorate kawta department meeting hmanpuiin thu a sawi a. Dr. R Lalthangliana chuan, “Orissa-ah phei chuan mining atangin revenue cheng vbc 50000-te an la lut a, central sorkar puihna pawh an mamawh tawh lo, mining lam hi kan thawh that chuan Zoram hmasawnna min thlen theitu a ni,” a ti.
Dr R Lalthangliana hian kumin tir lama Bangladesh Commerce minister nen an indawr khan hmarcha, sawhthing, aieng tih vel mamawh tho mah se, lung an mamawhna a nasa a, Bhutan atang tein an la lut a, Mizoram lungte hi an it em em a, nakin lawkah chuan lung atang hian sum hnar tha tak ramin a la nei dawn tih a sawi.
October 31, 2022-a Nagaland-ah North East Geology & Mining Ministers’ Conclave, a kaihhruaina hnuaia an neih tum leh September 9-10, 2022-a Hyderabad-a National Mines Ministers’ Conference an neih tumin, minor minerals (lung, balu, etc.) enkawl dan hi hmarchhak state zawng zawngah siam vek ni se, EF&CC Dept. nena harsatna a awm loh nan Geology & Mining kuta dah pumhlum anih theih nan state tin hma la turin ngen an rel thu te, Pralhad Joshi, Parliamentary Affairs, Coal & Mines in Rs 5.0 crore chu hmarchhak state ten mineral haichhuahna leh zawnchhuahna tura infrastructure lam tih changtlunna atan pek nghal a tiam a, hemi atan hian proposal siama theh lut turin central sorkar chuan a rawn hriattir tawh niin a sawi.
Sorkar department hian post thar a siam theih rih loh rual hian, ram sum hnar lak luhna ber tur thawktu mining bikah chuan post thar siam turin cabinet-ah vawi hnih a thlen tawhin, thawhpuite pawh an inhawng hle nia sawiin, “Thawktu kan indaih chuan tun ai hian kan thawk chhuak nasa ang. Sorkar department hi chak taka kal tur chuan thawktu indaih a ngai a. Kan thawh chuan Pathianin mal min sawm ang a, ka hmu bawk ang,” Dr. R. Lalthangliana’n a ti.
Geology & Mining Director Lalthazuala kaihhruai inkhawma tar lan a nih danin, tunah hian Geology & Mining department hnuaiah hian thawktu 46 vel an awm a. Kumina revenue an chhun luh hi cheng nuai 600 vel lai a tling a ni.