- Ruata
South Korea company lar leh hlun tak mai Hyundai atanga lirthei lo chhuak tura beisei te tun tumah chuan kan thlir ho ang a, heng lirthei thar chhuak tura beisei paruk te hi a chhuah hun tur erawh puan chian a la ni lo a, Hyundai erawh chuan an buaipui mek niin a lang a ni
- Verna thar
Hyundai sedan hralh kal tak leh Mizoramah pawh lei hlawh tak Verna chu a chhuan thar, new generation model nakum chhoah hian a chhuah beisei a ni a. Kumthar tir lama Auto Expo, 2023 lo awm turah pawh an phochhuah beisei a ni. Verna thar hian design leh a chhunglamah te danglamna leh thil thar hrang hrang a rawn neih hmel a. A elpuite zinga ADAS (Advanced Driver Assistance System) tech nei hmasa ber a nih beisei a ni a, hemi hnuaiah hian himna leh lirthei khalhtu tana awlsamna hrang hrang lane departure warning, lane assist, blind spot monitoring, rear cross traffic collision avoidance assist, adaptive cruise control, emergency braking leh forward collision assist te a awm dawn a ni. A khawl lamah chuan 1.5L petrol, 1.4L turbo petrol leh 1.5L diesel khawl te a neih beisei a ni.
- Hyundai Grand i10 Nios Facelift
Hyundai chuan an hatchback tha tak mai Grand I10 Nios chu hmel thar nen tihchhuah leh an tum niin a lang a, India rama an enchhin lai thlalak te pawh a darh leh nual tawh a ni. He hatchback hmelthar rawn pu turah hian design leh thil hrang hrangah thil thar tam tak kan hmu dawn a, a chhunglama a kentel hrang hrangah pawh thil thar kan hmu dawn a, a infotainment system pawh a chhuak thar leh a screen pawh hlai zawk te kan hmuh hmel a ni. Grand i10 Nion thar tur hian 1.2L naturally-aspirated petrol khawl leh CNG hmang khawl te duhthlan tur a rawn neih beisei a ni.
- Hyundai Creta Facelift
Hyundai SUV hralh kal leh India miten an duh em em, Mizoramah pawh SUV man to lama hralh kal tak, Creta pawh hmelthar nen an rawn tlangzarh leh dawn niin a lang a. Auto Expo, 2023-ah pawh he lirthei hi an phochhuah hman ngei beisei a ni. Next generation Hyundai Tucson hmelhmang ang a rawn put beisei a ni a, hmanraw changkang leh tunlai thei ang bera ‘update’ a nih beisei a ni a, tuna chhuak mek pawh hi a changkangin a mawi sa tawh viau a, hei phei chu tha lehzual viau tura beisei a ni. A chhunglamah chuan danglamna liantham lutuk a awm loh hmel a, hetihrual hian a hmanraw ken tel hrang hrang erawh an ‘update’ leh ang a. Hyundai Verna thar tura hmuh kan beisei ang bawk, ADAS technology a rawn kentel tawh hmel a, tuna a khawl neihsa ang hi a rawn la hman chhunzawm zel beisei a ni bawk a ni.
- Hyundai Micro Suv
Hyundai hian entry level SUV an tih, micro SUV huanga mi tur lirthei thar an duang mek niin a lang a. Hei hi SUV huanga dah theih lirtheiah chuan a te ber tur a ni a, tuna chhuak mek Tata Punch, Nissan Magnite, Reault Kiger tihte hi a rawn el dawn a ni. Nakum kum tawp lamah a chhuah hmel a, hei pawh hi kumtira Auto Expo neih turah kan hmuh ngei beisei a ni. Tuna South Korea-a chhuak mek Casper CUV nghahchhana duan tur a ni a, Casper ai chuan a lian hret thung ang a, Hyundai line-up-ah chuan Nios leh Venue inkarah a awm dawn a ni. A chhung lam chu Grand i10 Nios lirthei ta a rawn tawm hmel a, 1.2L petrol khawl a neih hmel bawk a ni.
- Hyundai Ioniq 5
Khawvel huapa lar mek an electric lirthei changkang Ioniq 5 EV chu Hyundai hian nakumah India ramah an tlangzarh ve beisei a ni a. Rs. Nuai 45-60 man inkar bawr vel tur a ni a. Hyundai brand EV dedicated – E-GMP or Electric Global Modular Platform nghahchhana duan lirthei a ni. Battery chi hnih – 72.6kWh leh 58kWh hmang te duhthlan tur a awm dawn a, rear-wheel leh all-wheel-drive te duhthlan tur a awm dawn bawk a ni. 72.6kWh battery hmang hian km 470-480 vel a tlan thei a, a khawl pawh hi a chak tha dawn hle a, 306bhp tlukpui vel a pechhuak thei dawn a ni. Pakhat zawk 58kWh battery hmang zawk hian 169bhp power a pechhuak thei dawn thung.
- Hyundai i20 Facelift
Hyundai hian an i20 hmel thar tur hi ramdangah chuan an enchhin mek tawh a. Design thar mawi tak kan hmuh hmel a. A chhunglama a kentel hrang hrang pawh an tuaithar nasa viau dawn a, premium hatchback huanga lirthei mawi pawl tak ni sa mek hi a rawn mawi belh viau dawn niin a lang a ni. Hyundai i20 hmelthar hi India rama an tlangzarh tur chungchang sawi a la awm lo a, an lirthei chhuak turah chuan sawi hlawh lo pawl tak a ni rih a, company lam hi an la hmanhmawh lutuk lo a ni maithei a. Media report thenkhat chuan kum 2023 chhung emaw 2024-ah dawrh emaw India ramah kan hmuh an beisei rih a ni.