- MC Lalthianghlima
Mizo Academy of Letters (M.A.L) buatsaihsaih thu leh hla huanga thawh hlâwk chawimawina ‘Academy Award’ chu ni 2. December. 2022 ah L. Keivom (L) hnênah hlan a ni. L. Keivom hi ni 28. November. 2021ah a thih tawh avangin, a aiawhin a fapa David Lalhmingsânga Philippines-a awm chu he award dawng tur hian lokal vang vangin a Pa aiawhin he award hi a dawng ta a ni.
Academy Award 2022 hlanna hun hi M.A.L kum tâwp intawhkhawmna, synod conference centre, Pi Zaii hall ah ni 2. December. 2022 ah khân neih niin, he hun hi Prof. R.L. Thanmawia, President M.A.L in a kaihruaia, kal khawmte lawmna thu Prof. Rualkhuna Colney, Vice President M.A.L in a sawi. Rev. Lalhmuchhuaka’n hunserh hmangin Dr. Zoramdinthara, Secretary. Nl. Lalsangpuii Treasurer leh ‘Thu leh hla’ editor Reved. Chuauthuama-te hnên atangin report ngaihnawm tak ngaihthlak a ni a. Pi. Lalbiakzâmi leh Pu. Tlânglawmkima hnên atangin thu chham mâwi tak ngaihthlak a ni. Tin, Nl. C. Vanlalroluahtumi’n kalkhawmte zaiin min âwi bawk. L. Keivom (L) fapa David. Lalhmingsanga Keivom chuan thu a sawi bawk a. Dr. H. Laldinmawia’n academy award dawngtu L. Keivom chanchin thiam taka sawiin, ngaihthlak a manhla kher mai. Khuallian Dr. Z R Thiamsânga M.L.A leh M.A.L joint headquarters Lunglei leh affiliated club hrang hrang atangin thusawina hun an hmang bawk.
He hun pawimawh takah hian M.A.L member chatuan ram pan ta mi pahnih Pu James Lalchhuanawma (R.I.P) leh Pu MC. Lalrinthanga (R.I.P) te sûnna hun urhsun taka hman a ni bawk. Hun tâwp khar nan Pu Rozâma Chawngthu chuan lawmthusawina hun a hmanga, tichuan he hun hlu tak chu khar a lo ni ta a ni.
Academy Award hlanna inkhawmah hian kal tur âwm chu an kal tha viau a, award dawngtu L.Keivom family chu, he hunah hian an lokal tha hle bawk a. L. Keivom thian thate zingah Pu Lala Khobung leh L.Keivom lehkhabu Mizo tawnga a ziah zawng zawng chhuah saktu MC. Lalrinthanga (L) (M.C.L Publications) atangin MC. Lalthianghlima-te’n an tawiawm bawk.
He Academy Award 2022 hi L.Keivom (L) hnênah hlan a ni dawn tih kan hriat phat atangin, L.Keivom tu leh fa, a chhungte leh Pu Lala Khobung, Pu VL. Zaikima leh keini M.C.L publications chu, kan lawmin, kan phawklêk tawh a, chutihrualin mitthlaah a thiantha mual liam tawhte, Siamkima Khawlhring, R. Vanlawma, Zikpuii Pa leh kan Pa MC. Lalrinthanga leh amah L. Keivom (Pu Muanga) ngei pawh kan mitthlaah an rawn lang chuai chuaia, an zavai hian la dam ta se, an hlimna sân tur ziate kan ngaihtuaha, an ri lê-lu anga, an intawiawmin an bengchheng leh nga, hlim takin chawhlui an kilho leh ngeiin ka ring, mahse lei ruai aia ropui zawk van ruai ropui chu lungsi takin an kilho ngei ang.
Mizo Academy of Letters hian, thu leh hla ziak mi, mi langsar leh thawh hlawk hmingthate hnenah kum 1979 atang khân ‘Academy Award’ hi an hlan tan a. L. Keivom tiam hian mi sawm leh palite hnênah he award hi an hlan tawh bawk. Academy award dawng tawh zinga mi pathum Rev. Dr. Zairema. KC. Lalvunga (Zikpuii Pa) leh L. Keivom-te hi an thih hnua he award hlante an ni.
Tin, M.A.L hian kum 1989 atang khan kum tin Mizo irawm chhuak lehkhabu zinga tha ber ‘Book of the year’ an thlang thin a; hmun hrang hranga Zofate’n an hlut êm êm a ni.
L. Keivom (L) khan lehkhabu rotling tak tak Zofate min hnutchhiah a. Mizotawng a a lehkhabu ziahte hi sawm leh pakhat an ni a, chu’ng zinga pakhat ‘Zoramkhawvel volume 1’ chu book of the year ah thlan a lo ni tawh nghe nghe. Tin, Bible pumpui hi hmar tawngin a let bawk a Genesis atanga Thupuan bu thleng hian, type writer-in a mah ngeiin a chhu chhuak vek a ni, he’ng atangte hian L. Keivom hi mi hratkhawkhêng a nih zia kan hre thei mai âwm e. Sâm leh solomona hlate/Hlathlankhawmte phei chu poetical word bakah, rhyme dik tak vekin a dah bawk. Bible pumpui Hmar tawng a a lehlin bakah Hmar tawngin lehkhabu pasarih lai a lo tichhuak tawh a ni. A bíktakin Mizo tawnga a lehkhabu ziahte hi Zofate’n vawiin thlengin an la hlut êm êm a, vawi tam chhutnawn (Reprint) an ni tawh nghe nghe.
Ram palai hna thawka khawvêl leh lam thleng thlenga hun a hman lai pawh khan, a mikhualna (ram dang) thilte chuan a ngaihtuahna laimu kha an luah tak tak thei lova, ‘Zoram khawvêl’ chu lungkham berah a rawn neih ta zêl a, a ngaihtuahna, a rilru leh a thisen zungzam zawng zawng kha he ‘Zoram khawvêl’ hian a fan chhuak a ni ber e.
“Zalêng dangte’n tuipui ral ram,
An zin biahthu ziak chiar nghian e;
Kei zawng ka biak zinna Zoram,
Lungdum takin ka hril dawn e.
Zoram khawvêl a mawi ber e,
Chhinlung naufa tual lênna hi;
A tlâng tluanin chhengchhe mahse,
Zofa lêng tân pialral a ni.
Huang tin kalsiam thlir tlâng turin,
Zoram khawvêl i fang dun ang;
Insuihkhawm hun tur thlir rengin,
Duhthu tinkim i sam dûn ang.”
Chutiang khawpa Zoram tana fapa hrin manhla L. Keivom chuan, ni 28. November.2021 ah chatuan ram min lo pan san ta a, he minung ramah hian a lei taksa chu awm tawhlo mahse, a kutchhuak leh sulhnu, a thu leh hlate hi keini zofate tân, rohlu chul theilo an ni reng tawh ang.
L. Keivom (L)