Aizawl: Aizawl Municipal Corporation (AMC) chuan nimin khan Chanmari Venga Dinari T Azyu building chu AMC Building Regulation bawhchhiaa sak a nih avangin an kalhsak.
AMC Enforcement Committee chairman, Corporator John Zosangliana Ralte chuan building an kalhsak chhan chanchinbumite hmaah sawifiahin, “Dinari T Azyu building hi sak tan a nih atangin sawiselna a awm nghal a, a bul vela cheng chhungkaw paruk ngawtin enfiah turin AMC-ah complaint an thehlut,” a ti.
Building chu ground floor bakah chhawng ruk dang sak phalsak ni mah se, dan bawhchhiain chhawng riat sak a ni tawh tih AMC Enforcement Committee chairman chuan a sawi.
“A building sir kual vel hrim hrim an sak dan pawh hian building regulation dan a bawhchhe tawh a, tuna a hma lama a ban an phunna pawh hi an ramri-ah chiah chiah an phun,” a ti bawk.
AMC Enforcement Committee chairman chuan, “Building regulation dan an bawhchhiat avangin building sak hna titawp turin vawi tam hriattir an ni tawh,” a ti a. Dan an bawhchhiat avanga sum chawi tur leh building sak lai titawp tura September 30-a hriattir leh an nih hnuah sak chhunzawm zel a nih avangin November 9, 2022-ah chhunzawm tawh lo tura hriattir leh an nih thu a sawi.
Building regulation bawhchhetu chungchang chu executive councillors meeting-ah thlen a nih thu leh executive councillors meeting-in a ngaihtuah hnuah December 2, 2022 khan order tichhuakin December 5-ah in kalhsak tura tih a ni ta tih AMC Enforcement Committee chairman chuan a sawi.
AMC Enforcement Committee-in an tar lan danin he building sak phalna an dila drawing leh structure-ah chuan chenna atan leh chhawng sariha zo tura design a ni a, hetihlai hian sumdawnna atan hman a ni leh ta a. Tunah hian building hi Agape Multispeciality Hospital-in an luah mek a; AMC hotute chuan hospital hian dan a bawhchhe lo va, dan pela che zawk chu building sak dan a nih thu an sawi bawk.