Los Angeles Lakers star Anthony Davis chu a inhliam leh thin avangin an fans tam tak beisei a phak lova. Tun season tir lamah player dang nena inthleng zingah tel mai se ti a duhthu sam hman an awm nual. Mahse a dam that chuan NBA a player palian zingah a tha ber pawl a nihna a lantir a. Washington Wizards 130-119 in an hneh phah.
Davis hian Thawhtanni zinga inkhelah point 55 a score a. Vawi 30 ball a shoot atangin vawi 22 a lut a, rebound 17 a la a. Block vawi thum a nei.
Davis hian NBA-ah a khelh chhunga match khat a point a score hnem ber dawttu na a ni a. Lakers a zawm hnua point a la score hnem ber tum a ni.
Hei chauh hi ni lovin Lakers legend Shaquille O’Neal nen chiah Los Angeles team tana inkhel zawna point 40 leh rebound 10 chuang nei thei awmchhun an ni.
“Milwaukee-ah team tha tak lakah hnehna ropui tak kan chang a, tunah inthlahdah thei kan ni lo. Theihtawp kan chhuah zel a ngai.”
“Kan team kan chetthat hi chhunzawm kan tum ruh hle a, inthlahdul kan tum lo. Offense leh defense-ah theihtawp chhuah kan tum a, a tira kan chet fuh loh kha nawhreh tumin kan bei mek.” tiin a sawi.
Lakers hi a zawnin away inkhelah vawi li a an chakna a ni a. An inkhel hnuhnung 10-ah vawi 8 chakin vawi hnih an tlawm a. Season turah vawi 12 an khelh atanga vawi hnih chiah chak an neih hnuah an NBA record siamthat an tum a. Tunah hian Western Conference-ah 12-na ni mekin play-in tournament khel phakah erawh an la awm lo. Tun season-ah match 60 khelh tur an la nei thung.