Aizawl: Agriculture Minister C Lalrinsanga, MNF Adviser chuan Chief Minister Zoramthanga hoin Agriculture Product Marketing Committee Act Board din turin ruahmanna an siam mek niin a sawi.
Thawhtannia Mizo Hnam Run-ah thu sawiin C Lalrinsanga hian agriculture-a rahbi thar an rem zawng zawngte hi kum thum an kalpui leh a nih chuan hmel fai takin hmasawnna an nei ngei dawn nia sawiin, “Agriculture Product Marketing Committee Act Board kan din dawn a, kan chief minister hoin ruahmanna kan siam mek a, chu chuan kan thlai tharte tihral zung zung dan kan ngaihtuah dawn a, India ram mai ni lo, foreign thlengin hralh kan tum a ni,” a ti.
C Lalrinsanga chuan tunah hian Germany leh USA-ah hmarcha (Mizo chilli) pawh matric ton li vel hralh chhuah tum mek a nih thu a sawi a. Buh tihthatna turin OB-12 hman tum a nih thu leh OB-12-a bacteria hian buh leh thlai thatna tur tam tak a pui a, pangang, thlai ei chhetu hrang hrangte hi tun lai khawl changkang leh thiamna hmangin an tihlum zel dawn a, dragonfruit pawh drip-technology hmangin enkawl mek a nih thu a sawi.
Agriculture minister hian tui verh chungchangah mahni compound chhunga duh duhna hmuna verhte hian tuihna tam tak a tihbo avangin ram humhim nan dan thar siam a tul nia sawiin, ‘The Mizoram River Protection Bill’ hmang turin ruahmanna an kalpui mek niin a sawi bawk.
MNF adviser hian Mizoramah hian political ruhrelah chuan MNF hi a lian ber niin a sawi a. Congress ruhrel lian tak la nei ve bawk mah se, central-a sorkarna an neih loh chuan thuruk lakna tur an neih loh avangin rintlak an ni chuang lo tih a sawi a. ZPM chu ruhrel nghet leh rintlak an neih loh avangin tangkawng chaw ang deuh hian tawh leh khawih chet hleka teh hak hak chauh an nih thu a sawi.
Mizo Hnam Run chhung inkhawm hi MNF Vice President Lalthlengliana’n a kaihruai a ni.