Vantlangin Oxford word of the year an thlan chu puan a ni ta a, ‘goblin mode’ tih tawngkam chu thlan a ni.
He tawngkam hi tladah, thahchhia, thil dah fel thlip thlep lo sawina tawngkam a ni a. Hripui len lai, engmah a tih theih loh laia mi inthlahdah sawina atanga hman lar a ni.
Oxford lexicographer-ten thumal thlan chhuah tur an chhawp chhuah pathum atanga thlan a ni.
Goblin mode hian vote a hmu hnem hle a, vote 318,956 zet hmuin 93% a tling phak.
Oxford English Dictionary tichhuaktu, Oxford University Press chuan he tawngkam hi miin an chet peih lohzia sawi nan hmangin, “Goblin mode-ah ka awm,” tih te, “Goblin mode-ah awm rawh,” in tih nante an hmang nasa niin a tar lang.
An sawi fiahnaah chuan ‘mahni kova tla tih tur ti lo, thatchhia, muangchanga ti, zawi sawina a ni a. A bik takin vantlanga tih tur puala tla leh an tih ve tura beisei ang chi pawh ti peih lo’ sawina a ni.
He thumal hi online lamah chuan kum 2009 atang khan hmuh tur a awm tan tawh a; mahse, kuminah hian lemchan thiam leh model, Julia Fox-i thubuai lar tak bakah Reddit-a thu an post-ah tute emaw goblin anga che sawi nana an hman atangin a lar thar ta a ni.
Covid avanga inkhuahkhirhna chi hrang hrangte thlahdul a nih hnuah miin an nun dan pangngai an zawh tan leh khan mi tam tak chuan tha thawh thar leh kha an peih lo hle a. Hemi inthlahdah leh thatchhiat laklawh sawina atan hian hman a ni bawk.
Goblin mode dawtah hian ‘metaverse’ tih chu vote hmu tam niin vote 14,484 a hmu a, ‘#IStandWith’ tih chuan vote 8,639 a hmu ve bawk.
Nikum khan word of the year chu ‘vax’ tih a ni a, hei hi coronavirus vaccine hmuh chhuah a niha invenna lak sawina kal zel tawngkam a ni.