Kum 2021 chhunga arm company lian zual zinga inhralh hnem chu United States-a mite niin company 40-te hi $ tluklehdingawn 299 zet an inhralh niin SIPRI chuan a tar lang a, an ralthuam hralh zat (item) erawh thil man sang avangin a hma kum aiin a tlem zawk thei thung.
Kum 2018 atangin company lian zual panga chu US-a mite vek an ni bawk a. Lockheed Martin, Raytheon Technologies, Boeing, Northrop Grumman leh General Dynamics an ni.
US company-te lian hle mah se report-ah hian Chinese ralthuam siamtute pawh an thang nasa hle tih a lang a. Chinese arms company pariatte chu $ tluklehdingawn 109an inhralh a, a hma kum aiin 6.3%-in an inhralh tam zawk a. A hralh tam zual pali phei chu khawvel puma inhralh tha 10 zingah an lang hial.
South Korean-te pawh an thang nasa hle a, SIPRI-in list a siama lang company palite hi a hma kum aiin 3.6%-a inhralh tha zawkin $ tluklehdingawn 7.2 man an inhralh a. A inhralh tha ber chu engine siamtu, Hanwha Aerospace an ni a, a hma kum aiin 7.6%-a inhralh tha zawkin $ tluklehdingawn 2.6 lai an lei chhuak a, anni hi kumin kumtir lama Poland nen ralthuam inleisak tura inremna an siam thar bawk avangin la inhralh tha chhunzawm tura ngaih an ni.
France-a hmunpui nei, Dassault Aviation Group pawh nasa takin an thang a, a hma kum aiin 59% zeta inhralh tamin $ tluklehdingawn 6.3 lai an inlei chhuak a. Heti taka an inhralh tam chhan hi Rafale combat aircraft 25 zet an hralh vang a ni.
Europe-a ralthuam siamtute chuan supply chain buai an tawrh nat avangin an inhralh tha lo va, military aerospace firm tam zawk phei chuan sum an hloh.
Europe-a inbun company 27 chu khawvela a lian zual 100-ah telin a hma kum aiin 4.2%-in an inhralh tam, $ tluklehdingawn 123 an inlei chhuak.