Defence company-ten kum 2021 chhunga ralthuam leh sipai bungrua an hralh chhuah a hma kum aiin 1.9%-in a tam zawk a, $ tluklehdingawn 592 man zet an inhralh.
Stockholm International Peace Research Institute (SIPRI)-in Thawhtannia Arms Industry Database an tihchhuah tharah bungraw khirh zualte thawn chhuah zung zungna kawngah harsatna awm mah se khawvela defence company lian zual 100-te inhralh chu a pung tho tih a tar lang.
2019-2022 chhung khan a hma kum aiin 1.1%-in an hralh tam zawk tawh a, kumin nen kum sarih chhung a zawnin ralthuam an hralh hi a pung tawh a ni.
SIPRI chuang bungraw inpek leh thawn zung zung buaithlakna chuan kum 2021 pawh a la tibuai deuh tih sawiin Ukraine indona avangin a la khirh zui dawn bawk niin an sawi.
“Kum 2021 chhung khan supply chain-ah harsatna awm lo phei sela chuan nasa takin ralthuam hralh hi a pung tura kan ngaih a ni,” tiin SIPRI Military Expenditure & Arms Production Programme-a director, Lucie Béraud-Sudreau chuan a sawi.
“Company lian leh têten hemi kumah hian harsatna an tawrh ve ve thu an sawi a. Company thenkhat, Airbus leh General Dynamics angte pawhin hnathawk tur an indaih lo nasa a ni,” a ti.
Russia-in February, 2022 atanga Ukraine a rûn chuan khawvel pumah ralthuam siamtute tan supply chain a tikhirh zual hle bawk tih SIPRI report-ah hian tar lan a ni.
Khawthlang ramte chu a tuar zualtu an ni a, anni hian Russia atangin an ralthuam siam chhuahna tura hmanrua (raw material) an la lut nasa a, indona avangin chawk luh an harsa ta a ni.
“Hei hian United States leh Europe ramten an sipaite an thuam chakna tur pawh a tikhawtlai a, Ukraine-ah pawisa tam tak man ralthuam leh hmanrua an thawn chhuak a, chumi hnawh khah leh chu a la buaithlak rih,” tiin SIPRI chuan a sawi.
Russia pawh a buai a, indona avanga ralthuam siam nasa taka punna ni mah se indo avanga hrekna an tawrh avangin a siamtuten semiconductor an chaw lut zung zung thei lo va, an thawn chhuah man an dawng rang thei lo bawk.