India ram football thuneitu All India Football Federation president Kalyan Chaubey chuan Thawhlehni khan Mizoram a lo tlawh a. Aizawl-ah Mizoram Football Association hruaituten lo hmuakin Mizoram Premier League Season 9 final a hmunah a en.
Kalyan Chaubey hi AIFF president zinga Mizoram rawn tlawh hmasa ber a ni a. September ni 2 khan AIFF president nihna chelh tura thlan tlin a nih hnuah hian Indian football hmasawnna tura ruahmanna tam tak kalpui a ni nghal.
Tata Football Academy chhuak, India tán pawha football lo khel tawh thin Kalyan Chaubey hi footballer hlui AIFF President hmasa ber a ni bawk.
Aizawl a lo thlen hnuah tlai dar 4 khan Aijal Club-ah amah puala lawmna hun hman a ni a. Hetah hain MFA bakah District Football Association hruaitute leh India internatinal player hlui pawh an tel.
He hunah hian president chuan Indian football atana an hmalakna te sawiin inkawmna hun hman a ni a. Chanchinbumi lamte zawhna chhanna hun tawi a hmang tel.
Indian football tana hmalakna tur hrang hrangah grassroots programme ngialnghet leh lian zawk an kalpui dawn a. State tinah school a football khelhna tur porgramme duan an tum tih a sawi.
Age group leh senior level-ah India team in hma a sawn theih nan AIFF hnuaia player an scout dan an siamthat tur thu kimchang takin a sawi tel a. Ram huap inelna a India chetthat chu an tum a nih avangin scouting an uluk a ngaih tur thu a sawi tel.